بالی ووڈ کے معروف اداکار کارتک آریان نے اپنی شاندار اداکاری اور حسنِ اخلاق کی وجہ سے لاکھوں لوگوں کے دل جیت لیے ہیں۔
کارتک آریان نے فوٹو اینڈ ویڈیو شیئرنگ ایپ انسٹا گرام پر احمد آباد سے مداحوں کے ہمراہ اپنی ایک ویڈیو شیئر کی ہے۔
اُنہوں نے اس ویڈیو کو شیئر کرتے ہوئے لکھا ہے کہ ’یہ آپ کا پیار ہے‘۔
اس ویڈیو میں دیکھا جاسکتا ہے کہ کارتک آریان سیکیورٹی کے ساتھ احمد آباد کی ایک گلی سے گزر رہے ہیں اور مداح اُنہیں اپنے علاقے میں دیکھ کر دیوانہ وار ان کے پیچھے آتے ہوئے نظر آ رہے ہیں۔
View this post on Instagram
کارتک آریان اتنی بڑی تعداد میں مداحوں کو جمع ہو کر اپنے پیچھے آتا دیکھ کر اپنے فون سے ان کی ویڈیو بناتے ہوئے مزاحیہ انداز میں پوچھتے ہیں کہ آپ سب لوگ کھانا کھانے جا رہے ہیں؟
اداکار کے اس سوال پر ایک مداح کو یہ کہتے ہوئے سنا جا سکتا ہے کہ ہم کارتک بھائی کے گھر جا رہے ہیں۔
واضح رہے کہ گزشتہ روز کارتک آریان کی ایک فلم کی شوٹنگ کے دوران اداکار کی صرف ایک جھلک دیکھنے کے لیے سینکڑوں کی تعداد میں مداح جمع ہو گئے تھے۔
اداکار بھارت کے شہر احمد آباد میں اپنی فلم ’ستیہ پریم کی کتھا‘ کی شوٹنگ کے دوران مداحوں کا اتنا پیار دیکھ کر حیران رہ گئے۔
