ممبئی (نیوز ڈیسک )گزشتہ روز کار حادثے میں زخمی ہونے والی بالی ووڈ اداکارہ و ماڈل ملائکہ اروڑا کو آج اسپتال سے ڈسچارج کردیا جائے گا۔
بھارتی میڈیا سے گفتگو کرتے ہوئے ملائکہ اروڑا کی بہن امریتا اروڑا نے بتایا کہ اُن کا سی ٹی اسکین کیا گیا ہے جس کی رپورٹ بالکل ٹھیک آئی ہے۔
امریتا اروڑا نے بتایا کہ ملائکہ کی طبیعت بہتر ہورہی ہے، وہ کچھ وقت کے لیے اسپتال میں ڈاکٹرز کی زیرِ نگرانی رہیں گی اور پھر اُنہیں آج ہی ڈسچارج کردیا جائے گا۔
دوسری جانب اسپتال انتظامیہ نے بھارتی میڈیا کو بتایا کہ ملائکہ اروڑا کے سر پر معمولی چوٹیں آئی ہیں تاہم وہ خطرے سے باہر ہیں۔
واضح رہے کہ بھارتی میڈیا کی رپورٹ کے مطابق اداکارہ کی گاڑی کو حادثہ کھوپولی ایکسپریس وے پر پیش آیا جہاں تین گاڑیاں آپس میں ٹکرائیں۔
مقامی پولیس کا کہنا تھا کہ اداکارہ و ماڈل کو اس حادثے میں معمولی چوٹیں آئیں، جبکہ انہیں فوری طور پر قریبی اسپتال پہنچایا گیا۔
پولیس نے بتایا کہ اس معاملے کی تحقیقات کے بعد اس کا مقدمہ درج کیا جائے گا۔
