آپ جب لائبریری سے کوئی کتاب لیتے ہیں تو آپ کو پتا ہوتا ہے کہ کتاب کو ایک مقررہ میعاد کے بعد واپس بھی کرنا ہوتا ہے اور ایسا نہ کرنے کی صورت میں جرمانے کی ادائیگی بھی کرنا پڑتی ہے۔ تاہم کچھ ایسے بھی ستم گر ہیں جو لائبریری سے کتب لے کر واپس کرنے کی زحمت ہی نہیں کرتے۔
ایک ایسا ہی واقعہ پیش آیا ہے برطانیہ میں جہاں ایک نامعلوم شخص نے یونیورسٹی کالج لندن (یو سی ایل) کی لائبریری کو 50 برس پہلے لی گئی ایک کتاب اب ڈاک کے ذریعے واپس بھجوائی ہے اور اس کے ساتھ ایک تحریر شدہ خط بھی موجود ہے۔
گزشتہ ہفتے یونیورسٹی کالج لندن نے ایک ٹویٹ شیئر کی تھی جس میں کتاب بھیجنے والے کی تحریر بھی شامل کی گئی ہے۔
یونیورسٹی کی لائبریرین سوزین ٹراؤس کا کہنا ہے کہ یہ کتاب اور اس پر لکھی تحریر کو دیکھ کر وہ دنگ رہ گئیں۔
اِس تحریر میں لکھا ہے کہ ۔۔۔ ڈیئر لائبریرین، یہ کتاب 50 برس تک واپس نہیں کی گئی۔ مہربانی فرما کر اسے ردی کی ٹوکری میں مت پھینک دیجیے گا کیونکہ اب یہ نوادرات میں شامل ہو چکی ہے۔
برطانوی اخبار ایوننگ سٹینڈرڈ کے مطابق یہ کتاب ایک ڈرامے ’’کیورولس‘‘ کا 1875ء کا ایڈیشن ہے جسے 1974ء کے موسم گرما میں یونیورسٹی کالج لندن کی لائبریری کو واپس کیا جانا تھا۔
یونیورسٹی کالج لندن کی لائبریرین سوزین ٹراؤس کے مطابق 10 پینس فی دن کے حساب سے اس کتاب پر اب تک 1254 برطانوی پاؤنڈز کا جرمانہ بنتا ہے۔
