اسلام آباد (مانیٹرنگ ڈیسک) نواز شریف کو ڈپلومیٹک پاسپورٹ کا اجراء روکنے اور وطن واپسی پر گرفتار کرنے کی درخواست کی سماعت کے دوران اسلام آباد ہائیکور ٹ نے ریمارکس دیے کہ اشتہاری کو سرینڈر کرنا ضروری ہے ، اشتہاری کسی بھی ریلیف کا مستحق نہیں رہا۔

اسلام آباد ہائیکورٹ کے چیف جسٹس اطہر من اللہ نے شہری نعیم حیدر کی درخواست پر سماعت کی ،  عدالت نے استفسار کیا کہ  بتائیں وفاقی  حکومت نے کب آرڈر کیا جس سے آپ متاثر ہوئے ہیں،  یہ کورٹ ہوا میں تو کوئی آرڈر نہیں کرے گی ، پورے میڈیا میں  اس کے چرچے ہیں ، ہم نے کوشش کی کہ وہ آرڈر ملے مگر نہیں مل سکا ،  عدالتی فیصلے میں موجود ہے کہ اشتہاری کا سرینڈر کرنا ضروری ہے ۔

عدالت نے ریمارکس دیے کہ کوئی اشتہاری ہے تو اس کے ساتھ  قانون کے مطابق کارروائی ہو گی ۔ وکیل درخواست گزار نے کہا کہ اشتہاری کو  پاسپورٹ جاری ہو تو عدالت کی عزت کا سوال ہے ۔ چیف جسٹس اطہر من اللہ نے ریمارکس دیے کہ اس عدالت کی عزت عدالتی فیصلے  ہیں ۔

عدالت نے درخواست گزار سے کہا ک عدالت کے پاس پہلے سے ہی بہت  کیسز ہیں ، سائلین کیلئے قیمتی وقت ہے ،  عدالتی وقت ضائع کرنے پر کیوں  نہ آپ پر جرمانہ عائد کیا جائے ۔

عدالت نے درخواست قابل سماعت ہونے سے متعلق فیصلہ محفوظ کرلیا۔