اسلام آباد(صغیرچوہدری)زبردستی پانچ کروڑ روپے کے چیک دستخط کرانے پرڈپٹی کمشنر عرفان میمن اور ایڈیشنل ڈپٹی کمشنر کے خلاف مقدمہ درج کرنے کا حکم، اسلام آباد ہائی کورٹ نے تھانہ گولڑہ کے سب انسپکٹر امتیاز اور کانسٹیبل نادر کے خلاف بھی مقدمہ درج کرنے کے احکامات جاری کردیئے۔ اسلام آباد ہائی کورٹ کے جسٹس بابر ستار نے شہری شیر زادہ کی جانب سے حبس بے جا میں رکھنے اور اغوا برائے تاوان کا مقدمہ درج کرنے کی درخواست منظور کر لی۔ پٹیشنر کی جانب سے عثمان وڑائچ اور بابر حیات سمور ایڈووکیٹ پیش ہوئے ۔ درخواست گزار کے مطابق اسےڈپٹی کمشنر کے آفس میں بلا کر چار گھنٹے حبس بے جا میں رکھا گیا ۔ موبائل چھین لیا گیا، چیک بک گھر سے منگوائی گئی ۔غیر قانونی طور پر 5 کروڑ کا چیک زبردستی لے کر کیش کرایا گیا ۔ جعلی ڈیڈ بنوا کر دستخط کرائے ،زبردستی 2 پولیس اہلکار گواہ بھی بنائے گئے۔ زیر دفعہ A.22 اے کے آرڈر میں عدالت نے لکھا ہے کہ پولیس کا کنڈکٹ درست نہیں ۔ استدعا ہے کہ ڈپٹی کمشنر عرفان نواز میمن ، ایڈیشنل ڈپٹی کمشنر اور پولیس اہلکاروں کے خلاف مقدمہ درج کیا جائے ۔ عدالت نے کہا ڈی سی کیسے اپنے دفتر میں کسی کو حبس بے جا میں رکھ سکتا ہے ؟ دو پرائیویٹ شہریوں کے تنازع میں ڈپٹی کمشنر کیسے عدالت لگا سکتا ہے ؟ ڈی سی کے خلاف درخواست کی تحقیقات کون کرے گا ؟ عدالت نے شہری کی جانب سے مقدمہ اندراج کی درخواست منظور کر لی.