اسلام آباد(ویب ڈیسک)وفاقی وزیر قانون و انصاف اعظم نذیر تارڑ نے انصاف، مساوات اور سب کے لیے احترام کےارفع اصولوں کی رہنمائی میں ایک روشن مستقبل کی طرف جدوجہد کی اہمیت کو اجاگر کرتے ہوئے کہا ہے کہ یوم پاکستان ترقی اور خوشحالی کی طرف ہمارے اجتماعی سفر کی یاد دہانی کراتے ہوئے ہمارے عوام کے ناقابل تسخیر جذبے کا منہ بولتا ثبوت ہے جو ہر شعبہ زندگی میں اعلی مقام حاصل کرنے کے لیے کوشاں رہتے ہیں۔
یوم پاکستان کے موقع پر اپنے پیغام میں وفاقی وزیر قانون و انصاف اعظم نذیر تارڑ نے کہا کہ یوم پاکستان مناتے ہوئے ہم اس قوت ، اتحاد اور غیر متزلزل جذبے کا جشن مناتے ہیں جو ہماری عظیم قوم کا تعین کرتا ہے۔ انہوں نے کہا کہ آج کے دن ہم اپنے آباؤ اجداد کے وژن اور قربانیوں کا احترام کرتے ہیں جنہوں نے ایک ایسے وطن کو تصور کیا جہاں انصاف، مساوات اور خوشحالی کی حکمرانی ہو۔
انہوں نے کہا کہ یوم پاکستان ترقی اور خوشحالی کی طرف ہمارے اجتماعی سفر کی یاد دہانی کا کام کرتا ہے۔ یہ ہمارے عوام کے ناقابل تسخیر جذبے کا منہ بولتا ثبوت ہے جو زندگی کے ہر شعبے میں سربلندی کے لیے کوشاں رہتے ہیں۔
اعظم نذیر تارڑ نے اس امر پر زور دیا کہ آئیے ہم جمہوریت، انصاف اور قانون کی حکمرانی کے اصولوں کو برقرار رکھنے کے اپنے عزم کا اعادہ کرتے ہوئے ایک خوشحال اور ہمہ جہت پاکستان بنانے کے اپنے عہد کی تجدید کریں جہاں ہر شہری ملک کی ترقی میں اپنا حصہ ڈال سکے۔ انہوں نےکہا کہ آئیے ہم ایک ساتھ مل کر انصاف، مساوات اور سب کے لیے احترام کے اصولوں کی رہنمائی میں ایک روشن مستقبل کی طرف جدوجہد کریں ۔
