خیبر پختونخوا کے مشیر اطلاعات بیرسٹر محمد علی سیف نے کہا ہے کہ مریم نواز کو متنبہ کرنا چاہتا ہوں کہ اگر پرویز الہیٰ پر تشدد ثابت ہوگیا تو آپ کیخلاف فوجداری مقدمات درج کئے جائیں گے۔
بیرسٹرسیف نے کہا ہے کہ پرویز الہیٰ کیساتھ اڈیالہ جیل میں پنجاب حکومت کا رویہ تشویشناک ہے، سابق وزیر اعلیٰ پنجاب کا طبی معائنہ کرنے کی اجازت دی جائے اور ان تک رسائی ممکن بنائی جائے۔
انھوں نے کہا کہ تسلی کرنا چاہتے ہیں کہ پرویز الہیٰ گر کر زخمی ہوئے یا ان پرتشدد کیا گیا۔
الزام لگاتے ہوئے ان کا کہنا تھا کہ ہمیں شدید تشویش ہے کہ مریم نواز ذاتی انتقام لے رہی ہیں اور ان کی ظالمانہ و آمرانہ حکومت سیاسی مخالفین کو تشدد کا نشانہ بنارہی ہے۔
ترجمان کے پی حکومت نے مزید کہا کہ پنجاب کی جیل میں بانی پی ٹی آئی اور پرویز الہیٰ سمیت پارٹی رہنماؤں اور کارکنوں کی حفاظت اور تحفظ پر ہمیں تشویش ہے۔
