ٹیکسلا(نیوز ڈیسک )سابق وزیر عمر ایوب خان نے اتوار کو حسن ابدال تھانے میں درخواست جمع کرادی، جس میں وزیر داخلہ رانا ثناء اللہ اور پولیس اہلکاروں کے خلاف مبینہ طور پر جان لینے کی کوشش کے الزام میں مقدمہ درج کرنے کی درخواست کی گئی۔

پی ٹی آئی رہنما درخواست دینے ایمبولینس میں تھانے پہنچ گئے۔درخواست کے مطابق، پولیس نے ان کی جان لینے کی کوشش کی اور کٹی ہل کے قریب ان کے ساتھ ساتھ پارٹی کارکنوں کو بھی تشدد کا نشانہ بنایا۔ مسٹر خان نے الزام لگایا کہ رانا ثناء اللہ، انسپکٹر جنرل آف پولیس، ڈی آئی جی، ڈی آئی جی (آپریشن)، ڈی پی او اور کچھ مقامی افسران واقعے میں ملوث تھے۔

صحافیوں سے بات کرتے ہوئے عمرایوب خان کے بھائی یوسف ایوب خان نے کہا کہ اگر پولیس نے مقدمہ کے اندراج میں تاخیر کی تو تمام قانونی فورمز سے رابطہ کیا جائے گا۔رابطہ کرنے پر ضلعی پولیس کے ترجمان نے تصدیق کی کہ ایک درخواست موصول ہوئی ہے جس میں سابق وزیر اور اعلیٰ پولیس حکام کو نامزد کیا گیا ہے۔ انہوں نے کہا کہ درخواست قانونی شاخ کو بھیج دی گئی ہے۔