اسلام آباد(ممتازنیوز)وفاقی وزیر برائے امور کشمیر، گلگت بلتستان و سیفران انجینئر امیر مقام سے مسلم لیگ (ن) آزاد جموں کشمیر کے صدر شاہ غلام قادر کی قیادت میں ایک وفدنے ملاقات کی۔
ملاقات کے دوران ،مقبوضہ کشمیر میں بھارت کے ڈھونگ انتخابات ، آزاد جموں و کشمیر کی ترقی اور مجموعی سیاسی صورتحال سے متعلق باہمی دلچسپی کے امور پر تبادلہ خیال کیاگیا۔
وفاقی وزیر امور کشمیر نے وفد سے گفتگو کرتے ہوئے کہاکہ بھارت غیر قانونی طور پر مقبوضہ جموں و کشمیر میں جعلی انتخابات کروا رہا ہے جو اقوام متحدہ کی قراردادوں کی کھلم کھلا خلاف ورزی ہے ۔ پاکستان کشمیریوں کی سیاسی ،اخلاقی اور سفارتی حمایت سے کبھی بھی دستبردار نہیں ہو گا ،مقبوضہ کشمیر میں ڈھونگ الیکشن کو مسترد کرتے ہیں۔
انتخابات کی کوئی قانونی یا اخلاقی, یا آئینی بنیاد نہیں ہے،پاکستانی حکومت اور عوام کشمیریوں کو تنہا نہیں چھوڑیں گے،حکومت پاکستان اور مسلم لیگ (ن) اس سلسلے میں اپنا فعال کردار ادا کرتے رہیں گے،ہم مقبوضہ کشمیر کی آزادی تک خاموش نہیں بیٹھیں گے،مسلم لیگ ن آزادکشمیر کے صدر شاہ غلام قادر نے اس موقع پر وفاقی وزیر کا شکریہ ادا کیا ۔
