ممبئی (شوبز ڈیسک) بالی وڈ اداکارہ شردھا کپور نے فلم ’عاشقی 3‘ کے حوالے سے ایک خاص اشارہ دیا ہے، جس نے مداحوں کے دلوں میں امیدیں جگا دی ہیں۔شردھا کو شہرت فلم ’عاشقی 2‘ سے ملی
جو 2013 میں ریلیز ہوئی تھی۔ اس فلم نے صرف 13 کروڑ روپے کی لاگت سے 100 کروڑ کا ہندسہ عبور کر کے باکس آفس پر دھوم مچائی۔ شردھا نے اس فلم میں آروہی کا یادگار کردار ادا کیا، جو ایک فلمی سنگر بننے کا خواب دیکھتی ہے اور اس کی زندگی میں راہول کی آمد اس کے لیے ایک نیا موڑ ثابت ہوتی ہے۔
کئی سال گزرنے کے باوجود، شردھا کے مداح آج بھی آروہی کے کردار کے دیوانے ہیں اور انہیں ’عاشقی 3‘ میں دیکھنے کی خواہش رکھتے ہیں۔ حالیہ انٹرویو میں جب شردھا سے اس سیکوئل کے بارے میں پوچھا گیا تو انہوں نے کہا، “یہ واقعی زبردست ہوگا۔”
انہوں نے مزید کہا، “مجھے اس بارے میں علم نہیں ہے، لیکن اگر فلم بنانے والے اس سیکوئل کے بارے میں سوچتے ہیں، تو وہ یقیناً کچھ بہت ہی دلچسپ بنائیں گے۔” شردھا نے واضح کیا کہ ‘عاشقی’ نے انہیں بے پناہ پیار اور تعریف دی، اور یہ وہ فلم تھی جس نے ان کی زندگی بدل دی۔
شردھا کا کہنا تھا، “اگر اس فلم میں میرے لیے کوئی چیلنجنگ اور نیا موقع ہوا تو میں اس کے لیے تیار ہوں گی۔”
فلم ’عاشقی 2‘ کو محیط سوری نے ڈائریکٹ کیا تھا، اور اس میں شردھا کے ساتھ آدتیہ رائے کپور نے مرکزی کردار ادا کیا۔ شردھا کی یہ تازہ گفتگو ’عاشقی‘ فرنچائز کے ممکنہ توسیع کے حوالے سے مداحوں کی دلچسپی کو بڑھا رہی ہے۔
