پاکستان شوبز انڈسٹری کے معروف اداکار منیب بٹ نے جوائنٹ فیملی سسٹم میں رہنے کے فائدے گنواتے ہوئے اسے مسائل کا حل قرار دے دیا۔
منیب بٹ نے حال ہی میں ایک نجی ٹی وی کے شو میں بطور مہمان شرکت کی جہاں اُنہوں نے جوائنٹ فیملی سسٹم کے بارے میں بات کی۔
اُنہوں نے بتایا کہ میں، میرا بھائی اور میرے والد صاحب اپنا اپنا الگ گھر لے کر رہنے کو مناسب نہیں سمجھتے کیونکہ جب شادی ہوتی ہے تو ابتداء میں بہت سے مسائل ہوتے ہیں۔
اداکار نے بتایا کہ ایسے میں اگر گھر میں والدین یا کوئی بڑا ہو گا تو وہ میاں بیوی کے درمیان صلح کروا سکتا ہے اور چھوٹے چھوٹے جو بھی مسئلے ہوتے ہیں وہ آرام سے حل ہو جاتے ہیں لیکن اگر گھر میں میاں بیوی ہی اکیلے رہ رہے ہیں اور کوئی مسئلہ ہوا تو ان کے درمیان صلح کون کروائے گا۔
اُنہوں نے کہا کہ ابھی میں جب لاہور آیا ہوں تو مجھے کوئی پریشانی نہیں ہے کیونکہ مجھے معلوم ہے کہ گھر میں میری بیوی یا بچوں کے ساتھ کوئی مسئلہ ہو تو سنبھالنے کے لیے میرے ابو اور بھائی گھر میں موجود ہیں، اس لیے مجھے لگتا ہے کہ جوائنٹ فیملی سسٹم میں رہنے کا فائدہ زیادہ ہے۔
منیب بٹ نے کہا کہ میرا خیال ہے کہ اگر پوری فیملی الگ الگ پورشنز میں ساتھ رہے، یعنی جہاں سب کا کچن الگ ہو تو کوئی مسئلہ نہیں ہوتا۔
اُنہوں نے اپنے گھر کے بارے میں بتایا کہ میرے گھر میں 3 پورشن ہیں، سب سے نیچے میں رہتا ہوں، درمیان میں بھائی رہتا ہے، سب سے اوپر میرے والدین رہتے ہیں اور ایک گھر میں رہتے ہوئے بھی سب کا الگ سسٹم ہے تو اللّٰہ کا شکر ہے کہ اب تک کوئی مسئلہ نہیں ہوا۔
