اسلام آباد (نیوز ڈیسک)وزیراعظم محمد شہباز شریف نے ترسیلات زر میں ریکارڈ اضافے پر قوم کو مبارکباد دیتے ہوئے اسے ملک کی معیشت کے لیے خوش آئند قرار دیا ہے۔ انہوں نے کہا کہ دسمبر 2024 میں ترسیلات زر کا حجم 3.1 بلین ڈالر تک پہنچا، جو نومبر 2024 کے مقابلے میں 5.6 فیصد زیادہ ہے۔

وزیراعظم نے مزید کہا کہ دسمبر 2023 سے دسمبر 2024 کے دوران ترسیلات زر میں 29.3 فیصد کا اضافہ دیکھنے میں آیا۔ انہوں نے بیرون ملک مقیم پاکستانیوں کی خدمات کو سراہتے ہوئے کہا کہ ترسیلات زر میں یہ ریکارڈ اضافہ ہمارے اوورسیز پاکستانی بھائیوں اور بہنوں کی جانب سے ملک کی ترقی میں ان کے آہنی عزم کا واضح ثبوت ہے۔

شہباز شریف نے کہا کہ ترسیلات زر میں اس نمایاں اضافے نے ان عناصر کے دعوؤں کو بے بنیاد ثابت کر دیا ہے جو ملکی معیشت کو جام کرنے کے نعرے لگا رہے تھے۔ وزیراعظم نے کہا کہ پاکستان اب معاشی استحکام کے بعد ترقی کی راہ پر گامزن ہو چکا ہے اور یہ کامیابی پوری قوم کی اجتماعی کوششوں کا نتیجہ ہے۔

انہوں نے اس عزم کا اعادہ کیا کہ حکومت پاکستان عوام کی فلاح و بہبود اور ملکی ترقی کے لیے ہر ممکن اقدام کرے گی۔ وزیراعظم نے کہا کہ بیرون ملک پاکستانی ہماری معیشت کی ریڑھ کی ہڈی ہیں اور ان کی خدمات کو ہمیشہ یاد رکھا جائے گا۔