نکاح کے 7 ماہ بعدنجی ٹی وی  کے معروف اینکر محمد جنید اپنی دلہنیا کو بیاہ کر لے آئے۔

محمد جنید نے گزشتہ سال 2 جون کو آمنہ نامی خاتون سے نکاح کیا تھا اور دلچسپ انداز میں اس کی اطلاع سوشل میڈیا پر دی تھی۔

انہوں نے خبریں پڑھنے کے آئیکونک اسٹائل کو اپنایا اور خوبصورت کیپشن بھی لکھا جو کچھ اس طرح تھا کہ ’آج رات 9 بجے کی خبر یہ ہے کہ الحمداللہ میں نے نکاح کرلیا ہے۔’

محمد جنید کا نکاح معروف مذہبی اسکالر مفتی مینب الرحمان نے پڑھایا تھا اور تقریب میں محمد جنید کے عزیز و اقارب اور قریبی دوستوں سمیت معروف شخصیات نے شرکت کی۔

گزشتہ ماہ دسمبر میں ان کی شادی کے سلسلے میں فنکشنز کا آغاز ہوا تھا اور اس سلسلے میں جو سب سے پہلی تصاویر سامنے آئیں وہ ان کی ڈھولکی کے فنکشن کی معلوم ہوتی تھیں۔

ڈھولکی میں ان کے ساتھی اینکرز ہما امیر شاہ، شاہزیب خانزادہ، اینکر مبشر ہاشمی اور دیگر رونق جماتے ہوئے نظر آئے تھے۔

جس کے بعد اب وہ باقاعدہ بارات لے کر دلہنیا کو رخصت کروا کر لے آئے۔

محمد جنید کی شادی کی تصاویر سب سے پہلے اینکر پرسن ماریہ میمن نے شیئر کی تھیں۔

اپنی انسٹاگرام اسٹوری میں محمد جنید اور ان کی اہلیہ کے ہمراہ تصویر شیئر کرتے ہوئے ماریہ میمن نے دلچسپ کیپشن میں لکھا کہ ‘ان پرانے جوڑوں کی طرح محسوس ہورہا ہے جو نئے نویلوں کو دعائیں دینے آتے ہیں’۔