اقوام متحدہ کے سربراہ انتونیو گوتیرس نے ٹرمپ کے غزہ منصوبے کو نسل کشی کے مترادف قرار دے دیا۔
نیویارک ٹائمز کے مطابق اقوام متحدہ کے سیکریٹری جنرل انتونیو گوتریس نے ایک صحافی کے سوال کا جواب دیتے ہوئے کہا کہ ٹرمپ کا غزہ کی آبادی کو منتقل کرنے اور فلسطینی علاقے کو ترقی دینے کا منصوبہ ’نسل کشی‘ کے مترادف ہوگا۔
ایکس پر ایک پوسٹ میں اقوام متحدہ کے بیورو چیف، فاسیہی نے یہ بھی بتایا کہ گوتریس نے کہا کہ ٹرمپ کے منصوبے سے ’فلسطینی ریاست کا قیام ہمیشہ کے لیے ناممکن ہونے‘ کا خطرہ ہے۔
دریں اثنا، امریکی رکن کانگریس راشدہ طلیب نے بھی غزہ کے بارے میں ڈونلڈ ٹرمپ کے بیان پر سخت ردعمل کا اظہار کیا ہے۔
امریکی کانگریس میں ڈیموکریٹس کی نمائندگی کرنے والی واحد فلسطینی نژاد امریکی راشدہ طلیب کہاکہ ’یہ صدر نسل کشی کے ایک مجرم کے بغل میں بیٹھ کر کھلے عام نسل کشی کا مطالبہ کر رہا ہے‘۔
ان کا مزید کہنا تھا کہ ’وہ کام کرنے والے امریکیوں کو وفاقی فنڈز سے الگ کررہے ہیں جبکہ اسرائیلی حکومت کو فنڈنگ کا سلسلہ جاری ہے‘۔
دریں اثنا، کنیکٹی کٹ سے تعلق رکھنے والے ڈیموکریٹک سینیٹر کرس مرفی نے ڈونلڈ ٹرمپ کے اعلان پر تبصرہ کرتے ہوئے اپنی ایکس پوسٹ میں لکھا کہ ’وہ بالکل پاگل ہوگئے ہیں، غزہ پر امریکی حملے کے نتیجے میں ہزاروں امریکی فوجی ہلاک ہو جائیں گے اور مشرق وسطیٰ میں کئی دہائیوں تک جنگ جاری رہے گی، یہ ایک برے اور بیہودہ مذاق کی طرح ہے‘۔
سینیٹر کرس مرفی نے ایک اور پوسٹ میں لکھا کہ ’میرے پاس آپ کے لیے خبر ہے کہ ہم غزہ پر قبضہ نہیں کر رہے، لیکن میڈیا اور باتیں کرنے والا طبقہ کچھ دنوں تک اس پر توجہ مرکوز کرے گا اور ٹرمپ اصل کہانی سے سب کا دھیان ہٹانے میں کامیاب ہو جائیں گے، ارب پتی عام لوگوں سے چوری کرنے کے لیے حکومت پر قبضہ کر رہے ہیں‘۔
