اسلام آباد: بینظیر انکم سپورٹ پروگرام کی چیئرپرسن سینیٹر روبینہ خالد نے یومِ مزدور کے موقع پر تمام محنت کشوں کو خراجِ تحسین پیش کرتے ہوئے کہا ہے کہ “آج یکم مئی کے دن ہم تمام محنت کشوں کو سلام اور نذرانہ عقیدت پیش کرتے ہیں۔”سینیٹر روبینہ خالد نے کہا کہ ایک باوقار اور خوشحال معاشرہ تب ہی ممکن ہے جب ہر فرد کو عزت، روزگار اور ترقی کے مساوی مواقع فراہم کیے جائیں۔ انہوں نے کہا کہ بینظیر انکم سپورٹ پروگرام کے تحت “بینظیر ہنر مند پروگرام” کا آغاز کیا گیا ہے تاکہ مستحق خواتین اور ان کے بچوں کو ہنر سکھانے کے مواقع فراہم کیے جا سکیں۔انہوں نے مزید کہا کہ یہ پروگرام نہ صرف روزگار کا ذریعہ بنے گا بلکہ خود اعتمادی، خودداری اور عزتِ نفس کو بھی فروغ دے گا۔ ان کا کہنا تھا کہ “بینظیر ہنر مند پاکستان” بی بی شہید کے اُس خواب کی تعبیر ہے جس میں ایک باہنر، خوددار اور خوشحال پاکستان کی جھلک دکھائی دیتی ہے۔”بی بی شہید ہمیشہ کہتی تھیں کہ ہنر آپ کا سرمایہ ہے، جو کوئی آپ سے چھین نہیں سکتا۔ آئیے، مل کر اس خواب کو حقیقت میں بدلیں۔”