لاہور(نیوز ڈیسک) پاکستان تحریک انصاف (پی ٹی آئی) کے رہنما میاں عباد فاروق کو دو سالہ سزا مکمل ہونے کے بعد کوٹ لکھپت جیل سے رہا کر دیا گیا۔ ان کی رہائی کی تصدیق ان کے بھائی میاں شہزاد فاروق نے کر دی ہے۔
میاں عباد فاروق، کو دو سال قبل مختلف الزامات کے تحت گرفتار کیا گیا تھا۔ ان کے قانونی دفاع کی ذمہ داری پی ٹی آئی کے ہی ٹکٹ ہولڈر اور ممتاز وکیل رانا الماس لیاقت ایڈووکیٹ نے سنبھالی، جو مسلسل دو سال سے ان کے کیس کی پیروی کرتے رہے۔
رہائی کے بعد پی ٹی آئی کارکنان اور میاں عباد فاروق کے حامیوں نے ان کا پرتپاک استقبال کیا اور ان کی رہائی کو انصاف کی فتح قرار دیا۔ اس موقع پر میاں عباد فاروق نے کہا کہ وہ اپنی جماعت اور حلقے کے عوام کے لیے پہلے سے زیادہ جوش و جذبے کے ساتھ خدمات سرانجام دیں گے۔
پارٹی ذرائع کے مطابق میاں عباد فاروق جلد سیاسی سرگرمیوں میں بھرپور طریقے سے واپس آئیں گے۔ ان کی رہائی کو پی ٹی آئی کے لیے ایک حوصلہ افزا پیش رفت قرار دیا جا رہا ہے۔
