صوابی(نیوز ڈیسک) وفاقی وزیر امور کشمیر و گلگت بلتستان انجینئر امیر مقام نے صوابی میں میڈیا سے گفتگو کرتے ہوئے پاکستان تحریک انصاف (پی ٹی آئی) کو شدید تنقید کا نشانہ بنایا۔ اُنہوں نے کہا کہ جیسے بھارت کا جنگی جنون ناکامی سے دوچار ہوا، ویسے ہی پی ٹی آئی کا “فسادی جنون” بھی شکست کھا چکا ہے۔

انہوں نے کہا کہ پی ٹی آئی کی جانب سے دیا گیا “فائنل احتجاج” کا نعرہ بھی ناکامی کی ایک اور داستان رقم کرے گا اور یہ احتجاج پارٹی کے “تابوت میں آخری کیل” ثابت ہوگا۔ انجینئر امیر مقام کا کہنا تھا کہ پی ٹی آئی کی نہ سوچ بدلی ہے، نہ موڈ، اور نہ ہی ایجنڈا۔ اُنہوں نے طنزیہ انداز میں کہا، “جس طرح ’آپریشن سیندور‘ ناکام ہوا، ویسے ہی ’آپریشن اڈیالہ جیل سے رہائی‘ بھی ناکام ہوگا۔”

امیر مقام نے مزید کہا کہ جو لوگ مذاکرات سے بھاگتے رہے، وہ اب کس منہ سے تحریک چلانے کی بات کر رہے ہیں؟ انہوں نے دعویٰ کیا کہ عوام 9 مئی جیسے واقعات کی روشنی میں پی ٹی آئی کا مزید ساتھ دینے کو تیار نہیں۔

انہوں نے سمبڑیال میں مسلم لیگ (ن) کی حالیہ انتخابی کامیابی کو عوام کی جانب سے نواز شریف، شہباز شریف اور مریم نواز کی قیادت پر اعتماد کا اظہار قرار دیا اور کہا کہ یہ فتح ہر محاذ پر مسلم لیگ (ن) کی پالیسیوں کی جیت ہے۔