اسلام آباد: وزیراعظم محمد شہباز شریف کی زیر صدارت آئندہ برس کے حج انتظامات سے متعلق اہم جائزہ اجلاس منعقد ہوا جس میں وزارت مذہبی امور کو ابھی سے حج آپریشن کی تیاری شروع کرنے کی ہدایت کی گئی۔
وزیراعظم نے کہا کہ سعودی عرب کی جانب سے جاری کردہ حج پالیسی کی روشنی میں جامع لائحہ عمل فوری طور پر مرتب کیا جائے تاکہ پاکستانی حجاج کرام کو بہتر سے بہتر سہولیات فراہم کی جا سکیں۔
انہوں نے واضح کیا کہ آئندہ برس حاجیوں کی خدمت میں کسی قسم کی لاپرواہی یا کوتاہی ہرگز برداشت نہیں کی جائے گی۔
وزیراعظم نے ہدایت دی کہ نجی حج اسکیم کو باقاعدہ ریگولیٹ کیا جائے تاکہ نجی سطح پر جانے والے حجاج کرام کو بھی حکومتی معیار کے مطابق خدمات میسر ہوں۔
انہوں نے وزارت مذہبی امور کو یہ بھی کہا کہ آئندہ حج کے شیڈول کا جلد تعین کر کے مکمل منصوبہ بندی پیش کی جائے۔اجلاس میں وفاقی وزراء ڈاکٹر مصدق ملک، سردار محمد یوسف اور متعلقہ اعلیٰ حکام نے شرکت کی اور حج امور پر تفصیلی بریفنگ دی۔ وزیراعظم نے تمام متعلقہ اداروں کو آپس میں مربوط رابطہ رکھنے اور حاجیوں کی سہولت کے لیے بھرپور اقدامات کی ہدایت کی۔
حج آپریشن کی تیاری ابھی سے شروع کی جائے، غفلت برداشت نہیں ہوگی، وزیراعظم کی ہدایت
