اسلام آباد(نیوز ڈیسک)وفاقی وزیر اطلاعات عطاء اللہ تارڑ نے پی ٹی وی ہیڈ کوارٹرز میں پرچم کشائی کی تقریب سے خطاب کرتے ہوئے کہا کہ اس سال یوم آزادی کا جشن منفرد ہے کیونکہ مئی میں معرکہ حق نے دو قومی نظریئے پر مہر ثبت کی۔ انہوں نے کہا کہ دو قومی نظریہ ایک حقیقت بن کر ابھرا۔ دشمن نے پہلگام فالس فلیگ کی آڑ میں پاکستان پر جارحیت مسلط کرنے اور پاکستان کے تشخص کو مجروح کرنے کی کوشش کی لیکن پاکستانی قوم اور مسلح افواج نے ان عزائم کو ناکام بنا دیا۔

عطاء اللہ تارڑ نے کہا کہ جشن آزادی کے ساتھ معرکہ حق کی تاریخی فتح کا جشن بھی منایا جا رہا ہے۔ ہم نے آزادی کا تحفظ کیا اور دنیا کو واضح پیغام دیا کہ پاکستانی قوم اپنا دفاع کرنا جانتی ہے۔ افواج پاکستان نے بہترین حکمت عملی اپنا کر جنگ میں اپنی صلاحیتوں کا لوہا منوایا۔

انہوں نے کہا کہ اس دوران انفارمیشن وار فیئر بھی لڑی گئی، وزارت اطلاعات نے بہترین کردار ادا کیا۔ ڈیجیٹل وار فیئر میں قوم کا حوصلہ بلند رکھنا اور عالمی سطح پر پاکستان کا بیانیہ اجاگر کرنا ہمارا ہدف تھا۔ 65ء کی جنگ میں پی ٹی وی سے ملی نغمے نشر ہوئے تھے اور آج بھی یہ روایت جاری ہے۔