مالی سال 2025-26 کے پہلے ماہ، جولائی میں، بینکوں کی جانب سے گھروں کی تعمیر اور خریداری کے لیے دیے جانے والے قرضوں میں سالانہ بنیاد پر 2.8 فیصد اضافہ ریکارڈ کیا گیا ہے۔

اسٹیٹ بینک آف پاکستان کے جاری کردہ تازہ اعداد و شمار کے مطابق، جولائی 2025 میں ہاؤسنگ فنانسنگ کا مجموعی حجم 208 ارب روپے تک جا پہنچا، جو کہ جولائی 2024 میں فراہم کردہ 203 ارب روپے کے مقابلے میں زیادہ ہے۔

ماہانہ بنیاد پر بھی بہتری دیکھی گئی، جون 2025 کے مقابلے میں جولائی میں بینکوں کی جانب سے گھروں کے لیے دیے گئے قرضوں میں 0.7 فیصد اضافہ ہوا۔ جون میں یہ رقم 207 ارب روپے تھی، جو اگلے ہی ماہ بڑھ کر 208 ارب روپے ہو گئی۔

یہ اعداد و شمار ظاہر کرتے ہیں کہ ملک میں ہاؤسنگ سیکٹر میں بتدریج بہتری آ رہی ہے اور لوگ بینکوں سے قرض لے کر اپنی رہائش کی ضروریات پوری کرنے کی طرف رجوع کر رہے ہیں۔