لاہور (نیوز ڈیسک) بھارت کے دریائے راوی پر قائم مادھوپور ہیڈ ورکس کی اچانک خرابی کے باعث پاکستان کے زیریں علاقوں، خصوصاً لاہور میں شدید اور مسلسل سیلابی صورتحال پیدا ہوگئی ہے۔ انگریزی اخبار میں شائع منور حسن کی رپورٹ کے مطابق بھارت نے نہ تو پاکستان کو بروقت آگاہ کیا اور نہ ہی ہیڈ ورکس کے تکنیکی مسئلے پر حکام کو اطلاع دی۔
رپورٹس کے مطابق ہیڈ ورکس کے چار فلڈ گیٹس اچانک ناکام ہوگئے جس کے نتیجے میں درجنوں دیہات زیرِ آب آگئے اور وسیع زرعی رقبہ ڈوب گیا۔ کئی دہائیوں سے غفلت کے باعث 54 فلڈ گیٹس کی جدید اپ گریڈیشن نہ ہونے کا انکشاف بھی سامنے آیا ہے۔
Just IN:— Massive floods create havoc in Pakistani Punjab region. Thousands of people rendered homeless. pic.twitter.com/WMHAKcbUse
— South Asia Index (@SouthAsiaIndex) August 27, 2025
لاہور میں دریائے راوی کے پانی کی مقدار شاہدرہ کے مقام پر 2 لاکھ 20 ہزار کیوسک تک پہنچ گئی، جس سے ہزاروں افراد بے گھر اور کھیت کھلیان تباہ ہوگئے۔ فلڈ فورکاسٹنگ ڈویژن کے مطابق جمعرات کی شب غیر معمولی بلند سطح کا سیلاب ریکارڈ کیا گیا۔ حکام کا کہنا ہے کہ یہ بحران بھارت کے مادھوپور ہیڈ ورکس سے قابو سے باہر پانی کے اخراج کا نتیجہ ہے جس نے لاہور کے رہائشیوں کے لیے خطرات میں اضافہ کر دیا ہے۔
بھارتی مقامی حکام نے بھی اس صورتحال کو “انتہائی غفلت” قرار دیا اور کہا کہ ہر سال کروڑوں روپے دیکھ بھال پر خرچ ہونے کے باوجود مرمت تاخیر کا شکار ہے۔ موجودہ وقت میں 55 ہزار کیوسک پانی پاکستان میں داخل ہو رہا ہے جبکہ مرمت صرف پانی اترنے کے بعد ہی ممکن ہوگی۔
لاہور سمیت مختلف اضلاع کے دریاؤں میں طغیانی، پنجاب پولیس کاریسکیو اینڈ ریلیف آپریشن مسلسل جاری
لاہور سمیت سیلاب سے متاثرہ مختلف اضلاع میں 15 ہزار سے زائد پولیس افسران و اہلکار ریسکیو آپریشن میں مصروف pic.twitter.com/1lGc0wJ1Xr
— Government of Punjab (@GovtofPunjabPK) August 28, 2025
ماہرین کے مطابق سندھ طاس معاہدہ دونوں ممالک کو پابند کرتا ہے کہ وہ بروقت سیلابی ڈیٹا کا تبادلہ کریں تاکہ نقصانات سے بچا جا سکے۔ اس بحران نے ایک بار پھر معاہدے پر سختی سے عملدرآمد اور موسمیاتی لچکدار انفراسٹرکچر کی ضرورت کو اجاگر کیا ہے۔ مزید بارشوں کی پیشگوئی کے باعث ماہرین کا کہنا ہے کہ مستقبل میں بڑے نقصانات سے بچنے کے لیے پاکستان اور بھارت کے درمیان فوری مذاکرات ناگزیر ہیں۔
