رام اللہ (عرب میڈیا/ویب ڈیسک)فلسطینی اتھارٹی نے امریکا سے صدر محمود عباس کا ویزا بحال کرنے کا مطالبہ کیا ہے۔

عرب میڈیا کے مطابق صدر عباس کے ترجمان نبیل ابو رودینہ نے کہا کہ امریکا کے اس اقدام سے خطے میں کشیدگی اور تناؤ میں اضافہ ہوگا۔ انہوں نے عالمی برادری پر زور دیا کہ وہ فلسطینی صدر کا ویزا بحال کرانے کے لیے واشنگٹن پر دباؤ ڈالے۔

ترجمان نے بتایا کہ گزشتہ 24 گھنٹوں کے دوران مشرق وسطیٰ اور مغربی ممالک سے مسلسل رابطے کیے گئے ہیں، خاص طور پر ان ممالک سے جو اس معاملے سے براہ راست وابستہ ہیں۔

یاد رہے کہ محمود عباس کو آئندہ ماہ نیویارک میں ہونے والے اقوام متحدہ کے سالانہ اجلاس میں شرکت کرنا ہے۔