خیبر پختونخوا کے حساس ضلع لکی مروت میں دہشتگردی کی ایک اور کوشش اس وقت سامنے آئی جب وانڈا زاہد گل کے علاقے میں واقع لڑکیوں کے ایک پرائمری اسکول کو دھماکے کا نشانہ بنایا گیا۔ خوش قسمتی سے دھماکے کے وقت اسکول خالی تھا، جس کے باعث کوئی جانی نقصان نہیں ہوا، تاہم عمارت کو جزوی نقصان پہنچا ہے۔
دیسی ساختہ بم استعمال، دوسرا بم ناکارہ بنا دیا گیا
ڈسٹرکٹ پولیس آفیسر (ڈی پی او) نذیر خان کے مطابق، یہ واقعہ ہفتے کی رات پیش آیا اور حملے میں دیسی ساختہ بم (IED) استعمال کیا گیا۔
پولیس موقع پر پہنچی تو معلوم ہوا کہ اسکول میں دو بم نصب کیے گئے تھے — ایک پھٹ گیا جبکہ دوسرا بم ڈسپوزل اسکواڈ نے بروقت کارروائی کرتے ہوئے ناکارہ بنا دیا۔
ڈی پی او کے مطابق، واقعے کے بعد علاقے میں پولیس کی بھاری نفری تعینات کر دی گئی ہے، اور ملزمان کی تلاش کے لیے سرچ آپریشن جاری ہے۔