پاکستان اور آرمینیا کے درمیان بالآخر سفارتی تعلقات قائم ہو گئے جو دونوں ممالک کے لیے ایک بڑی اور تاریخی پیش رفت ہے۔
ترجمان دفتر خارجہ کے مطابق یہ اہم فیصلہ چینی شہر تیانجن میں پاکستان کے نائب وزیراعظم اسحاق ڈار اور آرمینیائی وزیر خارجہ کے درمیان ملاقات کے دوران ہوا۔ اس ملاقات کو دونوں ممالک کے درمیان کسی بھی سطح پر ہونے والی پہلی باضابطہ ملاقات قرار دیا جا رہا ہے۔
تعلقات کی بنیاد اقوام متحدہ کے اصولوں پر  دونوں رہنماؤں نے اس بات پر اتفاق کیا کہ پاکستان اور آرمینیا کے درمیان تعلقات کی بنیاد اقوام متحدہ کے چارٹر میں درج اصولوں پر رکھی جائے گی، جو خودمختاری، احترام اور پرامن بقائے باہمی پر مبنی ہیں۔
ملاقات میں دونوں ممالک نے معیشت، تعلیم، ثقافت اور سیاحت سمیت مختلف شعبوں میں تعاون بڑھانے کے عزم کا اظہار کیا۔ اس کے ساتھ ساتھ، دوطرفہ اور عالمی سطح پر مختلف فورمز میں بھی قریبی اشتراک کا فیصلہ کیا گیا ہے۔
ترجمان کا کہنا تھا کہ پاکستان اور آرمینیا نے عوامی ترقی اور خوشحالی کے لیے مل کر کام کرنے کے عزم کا اعادہ کیا ہے۔