اسلام آباد (نیوز ڈیسک) سپریم کورٹ نے خیبر پختونخوا میں گندم کی 30 ہزار بوریاں چوری ہونے کے اسکینڈل میں گرفتار اسسٹنٹ فوڈ کنٹرولر خالد خان کی ضمانت مسترد کر دی۔

سماعت کے دوران ایڈیشنل ایڈووکیٹ جنرل نے عدالت کو بتایا کہ ملزمان پر قومی خزانے کو 19 کروڑ 77 لاکھ 52 ہزار روپے کا نقصان پہنچانے کا الزام ہے۔ اس کیس میں شریک دیگر ملزمان کی ضمانت بھی پہلے ہی مسترد کی جا چکی ہے۔

عدالت کو مزید آگاہ کیا گیا کہ کیس کا چالان جمع کرایا جا چکا ہے اور معاملہ اینٹی کرپشن نوشہرہ میں زیرِ سماعت ہے۔

دو رکنی بینچ، جس کی سربراہی جسٹس حسن اظہر رضوی کر رہے تھے، نے دلائل سننے کے بعد خالد خان کی ضمانت کی درخواست مسترد کر دی۔