اسلام آباد (نیوز ڈیسک) پاکستان نے انٹرنیشنل مانیٹری فنڈ (آئی ایم ایف) کی کرپشن اینڈ ڈائیگناسٹک اسسمنٹ رپورٹ پر اپنا مفصل جواب تیار کرنے کا عمل شروع کر دیا ہے۔

سرکاری دستاویزات کے مطابق پاکستان کا مؤقف ہے کہ سرکاری شعبے میں گورننس میں نمایاں بہتری آئی ہے اور کرپشن کے سدباب کے لیے متعدد اصلاحات متعارف کرائی گئی ہیں۔

پاکستانی حکام کا کہنا ہے کہ فنانشل مانیٹرنگ یونٹ کو مزید فعال کیا گیا ہے، جبکہ فیڈرل بورڈ آف ریونیو (ایف بی آر) میں ٹرانسفارمیشن اور فیس لیس کسٹم کے اقدامات کے ذریعے کرپشن میں کمی لائی گئی ہے۔ اس کے علاوہ پولیٹیکلی ایکسپوزڈ پرسنز کے حوالے سے قوانین لاگو کیے گئے ہیں اور سول سرونٹس کے اثاثے ڈیکلیئر کرنے کے لیے قانون سازی مکمل ہو چکی ہے۔

ذرائع کے مطابق پاکستان نے آئی ایم ایف کی رپورٹ پر عدم اطمینان کا اظہار کیا ہے اور کہا ہے کہ آئی ایم ایف کو گورننس اینڈ کرپشن ڈائگناسٹک مشن کے دوران کیے گئے تمام اقدامات کو مدنظر رکھنا چاہیے تھا۔ پاکستان کا یہ بھی کہنا ہے کہ ایف بی آر نے ٹیکس اصلاحات بالکل انہی خطوط پر کی ہیں جو آئی ایم ایف اہداف میں شامل تھیں۔

مزید برآں پاکستان کا مؤقف ہے کہ ٹیکس نظام کو آسان اور شفاف بنانے کے لیے ٹرانسفارمیشن پلان پر عمل درآمد جاری ہے۔ حکومت نے پارلیمنٹ کی منظوری کے بغیر سپلیمنٹری گرانٹس کے لیے بجٹ ایڈجسٹمنٹ پر پابندی عائد کر دی ہے۔ اس کے ساتھ ساتھ ایف بی آر نے متعدد ٹیکس چھوٹ ختم کر دی ہیں اور صرف وہی چھوٹ برقرار رکھی گئی ہیں جو موجودہ قرض پروگرام کے تحت آئی ایم ایف کے ساتھ طے پائی تھیں۔

پاکستان اپنے تفصیلی جواب میں یہ مؤقف بھی اپنائے گا کہ اس نے نہ صرف اصلاحات کی ہیں بلکہ انہیں ادارہ جاتی سطح پر نافذ بھی کیا ہے، اس لیے آئی ایم ایف کو رپورٹ میں ان اقدامات کی عکاسی لازمی کرنی چاہیے تھی۔