اسلام آباد (نیوز ڈیسک)پاور ڈویژن نے سیلاب متاثرہ علاقوں میں بجلی کی بحالی سے متعلق رپورٹ جاری کرتے ہوئے بتایا ہے کہ ملک بھر میں متاثرہ گرڈز اور فیڈرز کی بڑی تعداد بحال کر دی گئی ہے اور 16 لاکھ سے زائد متاثرہ صارفین میں سے 13 لاکھ سے زیادہ کو بجلی فراہم کر دی گئی ہے۔

رپورٹ کے مطابق پیسکو کے علاقے سوات، بنر، شانگلہ، صوابی اور ڈی آئی خان میں 12 گرڈ اور 91 فیڈرز متاثر ہوئے تھے، جن میں سے 85 فیڈرز مکمل اور 6 جزوی طور پر بحال کر دیے گئے ہیں۔ 4 لاکھ 63 ہزار سے زائد متاثرہ صارفین میں سے 4 لاکھ 59 ہزار کو بجلی فراہم کی جا چکی ہے جبکہ باقی ساڑھے 3 ہزار صارفین کے لیے بحالی کا کام 12 ستمبر تک مکمل کر لیا جائے گا۔

گیپکو کے 11 گرڈز اور 103 متاثرہ فیڈرز میں سے 88 بحال ہو چکے ہیں، 7 لاکھ 35 ہزار متاثرہ صارفین میں سے 6 لاکھ 60 ہزار کو بجلی فراہم کر دی گئی ہے۔ باقی 75 ہزار صارفین کے لیے بحالی کا عمل پانی اترنے کے بعد مکمل ہوگا۔

لیسکو میں لاہور، اوکاڑہ، شیخوپورہ، قصور اور ننکانہ کے 67 متاثرہ فیڈرز میں سے 44 مکمل طور پر بحال کر دیے گئے ہیں۔ 73 ہزار میں سے 59 ہزار صارفین کو بجلی مل چکی ہے جبکہ باقی صارفین کو 5 ستمبر تک بجلی فراہم کر دی جائے گی۔

فیسکو کے زیرِ انتظام فیصل آباد، جھنگ، سرگودھا اور دیگر علاقوں میں 26 گرڈز اور 77 فیڈرز متاثر ہوئے تھے۔ اب تک 19 مکمل اور 54 عارضی طور پر بحال کیے جا چکے ہیں۔ متاثرہ صارفین کی تعداد ایک لاکھ 98 ہزار تھی جن میں سے 93 ہزار سے زائد کو بجلی فراہم کر دی گئی ہے۔

میپکو کے زیرِ انتظام 139 فیڈرز متاثر ہوئے جس سے 96 ہزار سے زائد صارفین متاثر ہوئے۔ پانی اترتے ہی ان فیڈرز کی بحالی شروع کی جائے گی۔

ٹیسکو کے علاقے شمالی وزیرستان اور خیبر میں 17 فیڈرز متاثر ہوئے تھے۔ 2 مکمل اور 11 عارضی طور پر بحال ہو گئے ہیں۔ 31 ہزار میں سے 7 ہزار صارفین کو بجلی فراہم کر دی گئی ہے جبکہ باقی صارفین کو 5 ستمبر کی شام تک ریلیف ملنے کی توقع ہے۔

ہیزیکو کے زیرِ انتظام مانسہرہ کے تینوں متاثرہ فیڈرز مکمل طور پر بحال ہو چکے ہیں۔

پاور ڈویژن کے مطابق مجموعی طور پر 49 گرڈز اور 497 متاثرہ فیڈرز میں سے 239 مکمل اور 249 کو عارضی طور پر بحال کیا گیا ہے۔ یوں اب تک 16 لاکھ 23 ہزار متاثرہ صارفین میں سے 13 لاکھ 7 ہزار کو بجلی فراہم کر دی گئی ہے۔ باقی تین لاکھ 15 ہزار سے زائد صارفین کے لیے بجلی کی بحالی کو اولین ترجیح دی جا رہی ہے۔