سپریم کورٹ میں انتظامی نوعیت کے اہم امور پر غور کے لیے فل کورٹ اجلاس 8 ستمبر (اتوار) کو طلب کر لیا گیا ہے، جو چیف جسٹس قاضی فائز عیسیٰ کی عدم موجودگی میںجسٹس یحییٰ آفریدی کی زیر صدارت دوپہر ایک بجے ہوگا۔
ذرائع کے مطابق، اجلاس کا ایجنڈا صرف ایک نکاتی ہوگا، جس میں حال ہی میں متعارف کرائے گئے سپریم کورٹ رولز 2025 میں ترامیم کا جائزہ لیا جائے گا۔ذرائع کا کہنا ہے کہ یہ رولز پہلےسرکولیشن کے ذریعے منظور کیے گئے تھے اور انہیں ججوں کی اکثریت نے منظوری دی تھی، تاہم بعض ججز کا مؤقف ہے کہ ایسے اہم ضوابط کی منظوری فل کورٹ اجلاس سے ہونی چاہیے تھی تاکہ تمام ججوں کی رائے شامل ہو۔
مزید بتایا گیا ہے کہ اجلاس سے قبل صدر سپریم کورٹ بار ایسوسی ایشن کی جانب سےتحریری تجاویز عدالت عظمیٰ کو بھجوائی جا چکی ہیں، جن میں خاص طور پرعدالتی فیسوں میں حالیہ اضافے پر تحفظات کا اظہار کرتے ہوئے اس میںنظرِ ثانی کا مطالبہ کیا گیا ہے۔
ذرائع کے مطابق، تاحال سپریم کورٹ کے کسی جج کی جانب سے رولز میں ترامیم کے لیےباضابطہ تجاویز جمع نہیں کروائی گئی ہیں، تاہم اجلاس کے دوران مختلف آراء اور تجاویز سامنے آنے کی توقع ہے۔یہ فل کورٹ اجلاس ایسے وقت میں ہو رہا ہے جب عدالتی امور سے متعلق کئی کلیدی ضوابط، بالخصوص مقدمات کی تقسیم، بینچ کی تشکیل، اور عدالتی فیسوں جیسے موضوعات پر بار اور بنچ کے درمیان مکالمے اور ہم آہنگی کی ضرورت پہلے سے کہیں زیادہ بڑھ چکی ہے۔