وزیرِ داخلہ محسن نقوی نے عید میلاد النبی ﷺ کے موقع پر پوری قوم اور امتِ مسلمہ کو مبارکباد پیش کرتے ہوئے کہا ہے کہ خاتم النبیین حضرت محمد ﷺ کی سیرت اور اعلیٰ اعمال ہم سب کے لیے بہترین نمونہ ہیں۔

اپنے پیغام میں محسن نقوی نے کہا کہ ولادتِ مصطفیٰ ﷺ وہ ساعتِ نور ہے جب آسمان کے دروازے کھلے اور زمین پر رحمتوں کا نزول ہوا۔ صادق و امین بن کر آپ ﷺ نے مکہ کی بے رحم فضاؤں میں دیانت و ایمانداری کی شمع روشن کی۔

ان کا کہنا تھا کہ حضور ﷺ نے دنیا کو ایک مثالی سماجی اور معاشی نظام عطا کیا جو آج بھی مشعلِ راہ ہے۔ غلاموں، یتیموں اور کمزوروں کے حقوق کے لیے آپ ﷺ کی تعلیمات قیامت تک کے لیے نظامِ عدل کی بنیاد ہیں۔

محسن نقوی نے کہا کہ فتح مکہ کے موقع پر دشمنوں کو معاف کر کے نبی کریم ﷺ نے انسانیت کو نئی معراج عطا کی۔ انہوں نے زور دیا کہ اگر ہم ترقی، خوشحالی، امن اور استحکام چاہتے ہیں تو ہمیں حقیقی معنوں میں اسوہ حسنہ ﷺ پر عمل کرنا ہوگا۔