ہونڈا ایٹلس نے پاکستان میں چھٹی جنریشن ہونڈا سٹی کا ایک نیا ویرینٹ ’ایسپائر ایس (Aspire S)’ متعارف کرا دیا ۔ اس کے ساتھ ہی کمپنی نے موجودہ 1.2 لیٹر CVT (اسپیشل ایڈیشن) اور 1.5 لیٹر ایسپائر ماڈلز کا فیس لفٹ ورژن بھی لانچ کر دیا ہے۔
نئی Aspire S 1.2 CVT کی قیمت 47 لاکھ 37 ہزار روپے مقرر کی گئی ہے، جب کہ 1.5 Aspire CVT کی قیمت 60 لاکھ 69 ہزار روپے اور 1.5 Aspire S CVT کی قیمت 61 لاکھ 49 ہزار روپے رکھی گئی ہے۔
نئی جنریشن نہیں، پرانے ماڈلز کو اپ ڈیٹ کر دیا گیا
یہ لانچ ایسے وقت میں سامنے آئی ہے جب چھٹی جنریشن ہونڈا سٹی کو پاکستان میں متعارف کرائے ہوئے تقریباً چار سال ہو چکے ہیں (2021 سے اب تک)۔ شائقین ایک عرصے سے ساتویں جنریشن سٹی کے منتظر ہیں جو کہ دنیا کے دیگر ممالک میں 2021 سے دستیاب ہے۔ مگر ہونڈا ایٹلس نے نئی جنریشن متعارف کرانے کے بجائے موجودہ ماڈلز میں اپ ڈیٹس لانے کا فیصلہ کیا ہے۔
کیا نیا ہے Aspire S میں؟
Aspire S میں ظاہری اور اندرونی دونوں پہلوؤں پر تبدیلیاں کی گئی ہیں تاکہ صارفین کو تازگی کا احساس ہو:
نیا ہونڈا ایمبلم (نمایاں تبدیلی)
دو نئے رنگ: کینیون ریور بلیو اور اگنائٹ ریڈ
بلیک ٹرنک اسپورلر LED ہائی ماونٹ اسٹاپ لیمپ کے ساتھ
بلیک شارک فن اینٹینا
LED ہیڈلائٹس، ریئر لائٹس اور فوگ لیمپس
بلیک کلر ڈور مررز اور اپڈیٹڈ کروم ڈور ہینڈلز
فرنٹ و ریئر کروم گارنش
نئے ڈیزائن کے الائے وہیلز
اندرونی تبدیلیاں بھی شامل
ہائی گریڈ فیبرک سیٹس (نئے پیٹرن کے ساتھ)
لیدر ریپڈ اسٹیئرنگ وہیل بیس بال اسٹچنگ کے ساتھ
لیدر سیلیکٹ نوب (بیس بال اسٹچنگ)
بہتر آڈیو کوالٹی کے لیے ٹویٹرز کا اضافہ
گاڑیوں کے ماہرین کا کہنا ہے کہ ہونڈا ایٹلس کا یہ اقدام مارکیٹ میں دلچسپی برقرار رکھنے کی ایک کوشش ہے۔ تاہم، بہت سے صارفین اب بھی ساتویں جنریشن ہونڈا سٹی کے منتظر ہیں، اور کمپنی کی جانب سے پرانی جنریشن کو برقرار رکھنا اُن کے لیے مایوس کن ہو سکتا ہے۔