اسلام آباد (مانیٹرنگ ڈیسک) پاکستان ریڈ کریسنٹ نے نااہل وینڈر کو لاکھوں روپے کا ٹھیکہ دے دیا، ترجمان کا کہنا ہے کہ PRCS کیلئے معیار اہم ہے، جسے ٹھیکہ دیا گیا وہ مسترد کئے جانے والے سے بہتر تھا؛ پروکیورمنٹ ڈپارٹمنٹ کے علاوہ تمام معاملات کی میرٹ پر تصدیق کیلئے دو مختلف پروکیورمنٹ کمیٹیاں موجود ہیں۔ تفصیلات کے مطابق پاکستان ریڈ کریسنٹ سوسائٹی (پی آر سی ایس) نے وینڈرز کو تقریباً 50 ملین روپے کا ٹھیکہ دیا ہے جنہوں نے سب سے زیادہ قیمت کا حوالہ دیا اور یہاں تک کہ مختلف اشیاء کی خریداری کے لیے لازمی ابتدائی تکنیکی تفصیلات لیبارٹری ٹیسٹ پاس کرنے میں ناکام رہے۔ دستیاب دستاویزات سے پتہ چلتا ہے کہ کس طرح پسندیدہ وینڈر کو ایڈجسٹ کرنے کے لیے طے شدہ معیار پر سمجھوتہ کیا گیا۔ دستاویزات کے مطابق EQ-DREF 2021 کے تحت نان فوڈ آئٹمز کی خریداری کا معاملہ 24 نومبر 2021 کو اخبارات میں معیاری فیملی ٹینٹ، کچن سیٹ، ترپال کی چادر اور اونی کمبل خریدنے کے لیے مشتہر کیا گیا۔ دستاویزات سے پتہ چلتا ہے کہ پروکیورمنٹ کمیٹی نے طے شدہ طریقہ کار کے مطابق وینڈرز کے فراہم کردہ نمونوں کے لیبارٹری ٹیسٹ کروائے تھے۔ کم بولی والے نے تمام لیب ٹیسٹ کلیئر کیے اور 47970روپے فی خیمہ معاوضہ بتایاجبکہ دوسرا وینڈر لیب ٹیسٹ میں فیل ہو گیا اور اس نے 70632 روپے فی خیمہ معاوضہ بتایا۔ تاہم سب سے کم بولی لگانے والے کو شدید جھٹکا لگا، پروکیورمنٹ کمیٹی نے 8 اپریل 2022 کو ہونے والے اپنے اجلاس میں سفارش کی کہ ٹینٹ اور کمبل کی خریداری کا ٹھیکہ تکنیکی طور پر نااہل اور سب سے زیادہ بولی دینے والے وینڈر کو دیا جانا چاہیے۔ 26 مئی 2022 کو قائم مقام ڈپٹی ڈائریکٹر ایچ آر نے ایک نوٹ شروع کیا جس میں لکھا کہ کمبل اور خیموں کی فراہمی کا ورک آرڈر زیادہ بولی کو دیا جانا چاہیے اور توثیق شدہ تبصروں کی رازداری کی وجہ سے اقتباس متعلقہ محکمے کو جاری کیا جائے۔