وزارتِ امورِ کشمیر نے 27 اکتوبر کو یومِ سیاہ بھرپور جوش و جذبے سے منانے کا فیصلہ کیا ہے، تاکہ مقبوضہ کشمیر کے عوام کے ساتھ یکجہتی کا اظہار کیا جا سکے۔ اس حوالے سے وزیرِ امور کشمیر انجینئر امیر مقام کی زیر صدارت ایک اہم اجلاس منعقد ہوا جس میں مختلف وفاقی وزارتوں، آزاد کشمیر، گلگت بلتستان اور چاروں صوبوں کے نمائندگان نے شرکت کی۔ اجلاس میں فیصلہ کیا گیا کہ 27 اکتوبر کو یومِ سیاہ کے موقع پر ملک بھر میں تقاریب، ریلیاں اور آگاہی مہمات منعقد کی جائیں گی، جبکہ بیرون ملک پاکستانی سفارت خانے بھی اس دن کو بھرپور طریقے سے منائیں گے۔
اجلاس سے خطاب کرتے ہوئے امیر مقام نے کہا کہ وہ مقبوضہ کشمیر کے مظلوم عوام کی جدوجہد کو سلام پیش کرتے ہیں، جنہوں نے دہائیوں سے بھارتی ریاستی جبر کے خلاف قربانیاں دیں اور آزادی کی جدوجہد کو زندہ رکھا۔ انہوں نے کہا کہ بھارت کے مظالم آج بھی جاری ہیں، ہزاروں کشمیری شہید ہو چکے ہیں یا قید کی صعوبتیں جھیل رہے ہیں، لیکن کشمیریوں کا حوصلہ کم نہیں ہوا۔ ان کا کہنا تھا کہ خوش آئند بات یہ ہے کہ مسئلہ کشمیر ایک بار پھر عالمی سطح پر توجہ حاصل کر رہا ہے۔
وزارتِ امورِ کشمیر نے یومِ سیاہ کے لیے نیا لائحہ عمل تیار کیا ہے، جس کے تحت آل پارٹیز حریت کانفرنس (اے پی ایچ سی) کی کوششوں کو سراہتے ہوئے یومِ سیاہ پر مشترکہ پیغام جاری کرنے کا فیصلہ کیا گیا ہے۔ اے پی ایچ سی کے رہنما شیخ متین نے اجلاس میں اظہارِ خیال کرتے ہوئے کہا کہ کشمیری اور پاکستانی ایک جسم کی مانند ہیں اور ہم یومِ سیاہ کی تمام سرگرمیوں میں بھرپور شرکت کریں گے۔ انہوں نے کہا کہ یہ دن عالمی برادری کو یاد دلانے کا موقع ہے کہ کشمیری عوام آج بھی اپنے حقِ خود ارادیت کے منتظر ہیں۔
اجلاس میں شریک تمام اداروں اور وزارتوں کو ہدایت دی گئی کہ وہ یومِ سیاہ کی سرگرمیوں میں مکمل تعاون فراہم کریں، جبکہ قومی میڈیا کو تمام تقریبات اور سرگرمیوں سے بروقت آگاہ رکھا جائے گا تاکہ یہ پیغام زیادہ سے زیادہ لوگوں تک پہنچ سکے۔ یاد رہے کہ 27 اکتوبر 1947ء کو بھارتی افواج نے مقبوضہ کشمیر پر غیر قانونی قبضہ کیا تھا، جس کے خلاف کشمیری عوام ہر سال اس دن کو یومِ سیاہ کے طور پر مناتے ہیں۔ وزارتِ امورِ کشمیر کی جانب سے اس سال اس دن کو نئے عزم، اتحاد اور عالمی سطح پر مؤثر پیغام رسانی کے ساتھ منانے کی تیاری مکمل کر لی گئی ہے۔