جاپان میں ایک منفرد اور حیران کن ٹیکنالوجی متعارف کرائی گئی ہے جس کی مدد سے ناظرین اب ٹی وی اسکرین پر دکھائے جانے والے کھانوں کا ذائقہ بھی محسوس کر سکیں گے۔
اس تجرباتی ڈیوائس ’’ٹیسٹ دی ٹی وی‘‘ (TTTV) کا نام دیا گیا ہے، جسے میجی یونیورسٹی کے پروفیسر ہومی میاشِتا نے اپنی تحقیقی ٹیم کے تعاون سے تیار کیا ہے۔ بظاہر یہ ایک عام فلیٹ اسکرین ٹی وی جیسا دکھائی دیتا ہے، مگر اس کے اندر ایک خاص ذائقہ منتقل کرنے والا نظام نصب ہے۔
رپورٹس کے مطابق یہ نظام دس بنیادی ذائقوں—جیسے میٹھا، کھٹا، نمکین اور دیگر—کو مخصوص تناسب میں اسکرین پر منتقل کرتا ہے۔ ناظرین اس اسکرین پر زبان رکھ کر یا ہلکا سا چھو کر وہی ذائقہ محسوس کر سکتے ہیں جو اس وقت ٹی وی پر دکھایا جا رہا ہو۔
پروفیسر ہومی میاشِتا کا کہنا ہے کہ اس ٹیکنالوجی کا مقصد محض تفریح فراہم کرنا نہیں بلکہ انسانی حسی تجربات کو نئی جہت دینا ہے۔ ان کے مطابق کورونا وبا کے دوران جب لوگ گھروں تک محدود تھے، تب یہ خیال پیدا ہوا کہ ٹیکنالوجی کے ذریعے دنیا کے مختلف ذائقوں سے لوگوں کو جوڑا جا سکتا ہے۔
یہ نظام مستقبل میں صارفین کو گھر بیٹھے دنیا بھر کے کھانوں کا تجربہ کرنے کا موقع دے سکتا ہے۔ اس کا ابتدائی پروٹوٹائپ گزشتہ سال تیار کیا گیا تھا، جبکہ اس کے کمرشل ورژن کی ممکنہ قیمت تقریباً ایک لاکھ جاپانی ین (تقریباً 639 امریکی ڈالر) بتائی جا رہی ہے۔ فی الحال یہ ڈیوائس عام صارفین کے لیے دستیاب نہیں اور مزید جانچ اور بہتری کے مراحل سے گزر رہی ہے۔
ماہرین کے مطابق اس ٹیکنالوجی کے استعمال کے امکانات ٹی وی تک محدود نہیں رہیں گے، بلکہ مستقبل میں اسے آن لائن کھانا پکانے کی تربیت، ریستورانوں کی ورچوئل مارکیٹنگ اور ذائقے کی بنیاد پر فاصلاتی تعلیم میں بھی استعمال کیا جا سکتا ہے۔