پاکستان سپر لیگ (پی ایس ایل) میں 85 کروڑ روپے کی سینٹرل پول گارنٹی کی پیشکش صرف دو نئی ٹیموں کے لیے مخصوص کی گئی ہے، جبکہ موجودہ فرنچائزز اس میں شامل نہیں ہیں۔ موجودہ پانچ فرنچائزز سے صرف ایک اضافی صفحے پر دستخط لیے گئے، اصل کنٹریکٹ پر کوئی تبدیلی نہیں کی گئی۔
تفصیلات کے مطابق، پاکستان کرکٹ بورڈ (پی سی بی) نے ساتویں اور آٹھویں ٹیموں کو پی ایس ایل 11 سے اگلے پانچ ایڈیشنز تک کم از کم 85 کروڑ روپے دینے کی یقین دہانی کرائی ہے۔ اسے “کم از کم سینٹرل پول انکم گارنٹی” کا نام دیا گیا ہے، جس کے تحت اگر کسی بھی ٹورنامنٹ میں ٹیم کا شیئر اس مقررہ رقم سے کم ہو جائے تو بورڈ کمی کو پورا کرے گا۔ بطور متبادل، نئی فرنچائزز کو اگلے ٹورنامنٹ کی فیس میں کمی کی صورت میں رعایت بھی دی جا سکتی ہے۔
پرانی پانچ ٹیمیں اس پیشکش سے محروم ہیں۔ ایک سے زائد ٹیم آفیشلز نے بتایا کہ انہیں ایسی کوئی آفر نہیں دی گئی، اور اگرچہ گارنٹی ملتی تو فائدہ ہوتا، لیکن ان کے خیال میں اس سے انہیں کوئی خاص نقصان یا فرق نہیں پڑے گا، کیونکہ سینٹرل پول سے عمومی طور پر ہر ٹیم کا حصہ 85 کروڑ روپے سے زائد ہی ہوتا ہے۔
ماہرین کا کہنا ہے کہ یہ قدم نئی فرنچائزز کو راغب کرنے کے لیے اٹھایا گیا، اور یہ تجویز ویلیوایشن کرنے والی غیر ملکی کمپنی نے دی تھی۔ اس فیصلے سے لیگ میں نئی ٹیموں کے داخلے کو آسان بنانے اور ان کے ابتدائی مالی دباؤ کو کم کرنے کی کوشش کی گئی ہے۔