سال 2025 دنیا بھر کے لیے قدرتی آفات اور بڑے حادثات کے حوالے سے انتہائی تباہ کن ثابت ہوا۔ سیلاب، زلزلے، جنگلاتی آگ اور ہوائی جہاز کے حادثات نے مختلف خطوں میں ہزاروں افراد کی جانیں لے لیں اور کھربوں ڈالر کا مالی نقصان کیا، جبکہ کئی ممالک کا بنیادی ڈھانچہ شدید متاثر ہوا۔
دسمبر کے وسط میں امریکی ریاست واشنگٹن میں شدید سیلاب آئے، جنہوں نے سکاجٹ کاؤنٹی کو بری طرح متاثر کیا۔ سوماس اور ہیملٹن جیسے قصبے زیرِ آب آ گئے، جہاں سوماس کے تقریباً 75 فیصد گھر تباہ ہو گئے اور ایک لاکھ سے زائد افراد کو محفوظ مقامات پر منتقل ہونا پڑا۔ اسی ماہ انڈونیشیا میں سیلاب اور لینڈ سلائیڈنگ کے واقعات میں 846 افراد ہلاک اور 547 لاپتہ ہو گئے، جبکہ ہزاروں مکانات اور زرعی زمینیں تباہ ہو گئیں۔
جنوری میں امریکی ریاست کیلیفورنیا میں لگنے والی شدید جنگلاتی آگ نے لاس اینجلس کے اطراف کے علاقوں کو جلا کر رکھ دیا۔ اس آگ میں کم از کم 16 افراد ہلاک، سینکڑوں زخمی اور 135 سے 150 ارب ڈالر تک کا معاشی نقصان ہوا۔
نومبر میں جنوبی تھائی لینڈ میں غیر معمولی سیلاب آئے جنہوں نے ہات یائی شہر کو زیرِ آب کر دیا، اور بعض علاقوں میں پانی کی سطح تین میٹر تک پہنچ گئی۔ یہ آفت ملک کے 10 صوبوں تک پھیل گئی، جس سے رہائشیوں اور مقامی معیشت پر شدید اثر پڑا۔