برطانیہ کو یورپ کے مختلف ملکوں سے ملانے والی یوروسٹار ٹرین سروس بجلی کی فراہمی میں خلل کے باعث مکمل طور پر معطل کر دی گئی ہے۔ یہ رکاوٹ کرسمس اور نئے سال کے درمیان سفر کے مصروف ترین دنوں میں پیش آئی، جس سے ہزاروں مسافر متاثر ہوئے۔
غیر ملکی میڈیا کے مطابق منگل کے روز چینل ٹنل میں بجلی کے نظام میں خرابی کے بعد لندن سے پیرس، ایمسٹرڈیم اور برسلز جانے اور آنے والی تمام یوروسٹار ٹرینیں روک دی گئیں۔ یوروسٹار انتظامیہ کا کہنا ہے کہ بجلی کی فراہمی میں مسئلے کے باعث ایک شٹل ٹرین ٹنل کے اندر ہی رک گئی، جس کے بعد حفاظتی اقدامات کے تحت سروس معطل کرنا پڑی۔
ترجمان کے مطابق لندن آنے اور جانے والی تمام ٹرینیں اگلے نوٹس تک بند رہیں گی۔ یوروسٹار نے اپنی ویب سائٹ اور دیگر پلیٹ فارمز کے ذریعے مسافروں کو صورتحال سے آگاہ کرتے ہوئے انہیں اپنے سفر کے منصوبے مؤخر کرنے کا مشورہ دیا ہے۔
یوروسٹار حکام کا کہنا ہے کہ بجلی کے مسئلے کے حل پر کام جاری ہے اور صورتحال معمول پر آتے ہی سروس بحال کرنے سے متعلق آگاہ کر دیا جائے گا۔