برطانیہ کی ملکہ کمیلا نے حال ہی میں بی بی سی ریڈیو کو دیے گئے ایک انٹرویو میں اپنی نوجوانی کے دوران ایک صدمہ خیز واقعے کا انکشاف کیا ہے، جس میں انہیں ٹرین میں ایک اجنبی شخص کی جانب سے ہراساں کیا گیا۔
ملکہ کمیلا نے بتایا کہ اس وقت وہ تقریباً 16 یا 17 سال کی تھیں اور ٹرین میں کتاب پڑھ رہی تھیں کہ اچانک ایک اجنبی شخص نے ان پر حملہ کیا اور انہیں ہراساں کرنے کی کوشش کی۔
انہوں نے کہا کہ اس مشکل لمحے میں انہیں اپنی والدہ کی نصیحت یاد آئی، جس سے وہ ہمت پائیں اور فوراً حاضر دماغی کا مظاہرہ کیا۔ ملکہ کمیلا نے بتایا کہ انہوں نے جوتا اتار کر حملہ آور پر دے مارا اور مزاحمت کے بعد فوراً ٹرین سے اتر گئیں۔
ملکہ کمیلا کے مطابق یہ واقعہ کئی برسوں تک ان کے لیے ذہنی صدمے کا سبب بنا رہا۔ وہ کہتی ہیں کہ جب بھی گھریلو تشدد یا ہراسانی کے موضوع پر بات ہوتی ہے، یہ واقعہ انہیں دوبارہ یاد آ جاتا ہے اور آج بھی انہیں پریشان کرتا ہے۔
یہ انکشاف نہ صرف ملکہ کمیلا کی ذاتی ہمت کو اجاگر کرتا ہے بلکہ نوجوانوں میں خوداعتمادی اور خطرات سے نمٹنے کے طریقوں پر بھی روشنی ڈالتا ہے۔