حکومت سندھ نے وزیراعلیٰ خیبر پختونخوا سہیل آفریدی کے کراچی دورے پر پروٹوکول دینے کا اعلان کر دیا ہے۔
وزیر ثقافت سندھ ذوالفقار علی شاہ نے میئر کراچی مرتضیٰ وہاب کے ہمراہ میڈیا سے گفتگو میں کہا کہ سہیل آفریدی کو کراچی آنے پر پروٹوکول دیا جائے گا، انہیں اجرک پہنائی جائے گی اور گلے بھی لگایا جائے گا۔
صوبائی وزیر نے مزید بتایا کہ کے ایم سی کے تعاون سے شہر میں ایک ہیریٹیج فوڈ اسٹریٹ بنائی جائے گی تاکہ تاریخی اور ثقافتی ورثے کو اجاگر کیا جا سکے۔
انہوں نے کہا کہ تاریخی عمارتوں کی تعمیر اور حفاظت کے دوران ہیریٹیج ڈپارٹمنٹ ہمیشہ موجود رہتا ہے، اور کے ایم سی کی ٹیم کا شکریہ ادا کیا کہ وہ چیئرمین بلاول بھٹو کے وژن کے مطابق کام کر رہی ہے۔
ذوالفقار علی شاہ نے یہ بھی واضح کیا کہ اگر کوئی بلڈر تاریخی عمارت گرانے کی کوشش کرے تو اسے فوری طور پر روکا جائے گا، حالانکہ کچھ عمارتیں ایسی بھی ہیں جو تاریخی فہرست میں شامل نہیں ہیں۔