امریکی حملوں کے بعد وینزویلا کے وزیر دفاع ولادیمیر پیڈرینو لوپیز نے واشنگٹن کو واضح پیغام دیا ہے کہ وہ ہار نہیں مانیں گے اور فتح حاصل کریں گے۔
اپنے بیان میں انہوں نے کہا کہ وینزویلا ایک متحد قوم کے طور پر اپنے مقصد کے لیے کھڑی ہے اور مذاکرات نہیں کرے گی۔ انہوں نے مزید کہا، “ہمارا پس منظر امن پر مبنی ہے۔ ہم ہمیشہ آزادی کے لیے لڑیں گے، انسانیت کے لیے اپنے بازو بڑھائے ہیں اور آئندہ بھی اپنی سرزمین اور عوام کی وحدت کا دفاع جاری رکھیں گے۔”
ادھر امریکا نے وینزویلا کے صدر نکولس مادورو اور ان کی اہلیہ کو گرفتار کر لیا ہے۔ امریکی صدر ڈونلڈ ٹرمپ نے تصدیق کی کہ امریکا نے وینزویلا اور اس کے لیڈر پر بڑے پیمانے پر کارروائی کی، اور امریکی میڈیا کے مطابق صدر مادورو کو امریکی فوج کے ڈیلٹا فورس نے پکڑا۔
امریکی اٹارنی جنرل کے مطابق صدر مادورو اور ان کی اہلیہ پر منشیات، دہشت گردی اور امریکا کے خلاف استعمال ہونے والے ہتھیاروں کے حصول کی سازش کے الزامات ہیں۔ اس سے قبل، 7 اگست 2025 کو وینزویلا کے صدر کی گرفتاری پر 50 ملین ڈالر کا انعام بھی اعلان کیا گیا تھا۔