گلگت بلتستان کے ضلع استور کے علاقے برزل پاس میں سڑک سے برف ہٹانے کے دوران ایک برفانی تودہ گرنے کے واقعے میں پاک فوج کے کیپٹن اسمد اور محکمہ تعمیرات عامہ کے مشین آپریٹر سمیت تین اہلکار شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق 2 اور 3 جنوری کی درمیانی شب برزل پاس پر سڑک کی بحالی اور فوجی نقل و حرکت کو یقینی بنانے کے لیے بھاری مشینری کے ساتھ برف ہٹانے کا آپریشن جاری تھا، جس کی قیادت کیپٹن اسمد کر رہے تھے۔
3 جنوری کی تقریباً رات دو بجے، جب آپریشن جاری تھا، اچانک برفانی تودہ گر گئی، جس کے نتیجے میں کیپٹن اسمد، دو سپاہی رضوان اور محکمہ تعمیرات عامہ کے مشین آپریٹر عیسیٰ برف میں دب گئے۔
شدید اور مسلسل کوششوں کے بعد ان چاروں کو برف سے نکالا گیا، تاہم کیپٹن اسمد، سپاہی رضوان اور مشین آپریٹر عیسیٰ جانبر نہ ہو سکے اور اپنی جانوں کا نذرانہ پیش کر دیا۔
آئی ایس پی آر نے کہا کہ یہ شہداء انتہائی خراب موسمی حالات میں ایک مشکل اور اہم آپریشن کی قیادت کر رہے تھے تاکہ فوج کی نقل و حرکت کو یقینی بنایا جا سکے۔ ان کی قربانی پاکستان کی مسلح افواج کی فرض شناسی اور مادر وطن کے دفاع کے جذبے کی روشن مثال ہے۔
یہ واقعہ یاد دلاتا ہے کہ ہمارے فوجی ہر حال میں قوم کی خدمت اور حفاظت کے لیے اپنی جانوں کو قربان کرنے سے دریغ نہیں کرتے۔