حال ہی میں سوشل میڈیا پر ایک ویڈیو وائرل ہوئی جس میں ایک خاتون پولیس وردی میں تھانے کے اندر بالی ووڈ فلم دھرندھر کے گانے پر رقص کرتی دکھائی دی۔ یہ ویڈیو خاص طور پر ایکس (سابقہ ٹوئٹر) پر مختلف اکاؤنٹس سے شیئر کی گئی، جس میں پس منظر میں گانا فاصلہ چل رہا تھا۔
ویڈیو وائرل ہونے کے بعد صارفین نے پولیس یونیفارم کے تقدس پر سوالات اٹھائے اور اسے تنقید کا نشانہ بنایا، بعض افراد نے یہ دعویٰ بھی کیا کہ یہ خاتون پاکستانی پولیس کی افسر ہیں۔
تاہم، آئی ویریفائی پاکستان کی تحقیق کے مطابق یہ دعویٰ غلط ہے۔ ریورس امیج سرچ اور دیگر ذرائع سے معلوم ہوا کہ ویڈیو میں دکھائی دینے والی خاتون کسی بھی پولیس فورس سے تعلق نہیں رکھتیں۔ وہ کراچی کی فیشن ماڈل اور اداکارہ ہیں، اور یہ ویڈیو ایک شوٹ کا حصہ ہے۔
تحقیق میں یہ بھی سامنے آیا کہ اداکارہ نے یہ ویڈیو 12 دسمبر 2025 کو اپنے انسٹاگرام اکاؤنٹ پر شیئر کی تھی، جس کے کیپشن میں واضح کیا گیا کہ یہ صرف شوٹ ہے اور اصل پولیس اہلکار اس طرح کے لباس یا ہائی ہیلز استعمال نہیں کرتے۔ اداکارہ کی دیگر پوسٹس سے بھی یہ بات واضح ہوتی ہے کہ پولیس وردی صرف ایک کردار کے طور پر استعمال کی گئی تھی۔
واضح رہے کہ گانے دھرندھر پر پہلے بھی پاکستان میں مبینہ طور پر تنقید ہو چکی تھی، جس کی وجہ سے ویڈیو کو کچھ حلقوں نے غلط طور پر پاکستانی پولیس سے جوڑ دیا۔
فیکٹ چیک کے مطابق یہ دعویٰ کہ وائرل ویڈیو میں خاتون پاکستانی پولیس افسر ہیں، غلط اور گمراہ کن ہے۔ حقیقت یہ ہے کہ وہ اداکارہ ہیں اور یہ ویڈیو ایک مختصر شوٹ کا حصہ ہے۔