آئی سی سی ٹی ٹوئنٹی ورلڈ کپ میں بنگلہ دیش کی عدم شرکت کی صورت میں پاکستان کی جانب سے بھی ایونٹ کے بائیکاٹ کا امکان ظاہر کیا جا رہا ہے۔
ذرائع کے مطابق اگر بنگلہ دیش ورلڈ کپ کھیلنے سے انکار کرتا ہے تو پاکستان بھی یکجہتی کے طور پر بائیکاٹ کا فیصلہ کر سکتا ہے۔ پاکستان کی جانب سے پہلے ہی بنگلہ دیش کو مکمل حمایت کی یقین دہانی کرائی جا چکی ہے۔
اطلاعات کے مطابق بنگلہ دیش آج اس حوالے سے حتمی فیصلہ کرے گا۔ بنگلہ دیش ٹیم کے کئی سینئر کھلاڑی ورلڈ کپ میں شرکت کے حق میں ہیں، جبکہ حکومت آج کھلاڑیوں کو اعتماد میں لے کر حتمی مؤقف اختیار کرے گی۔
واضح رہے کہ گزشتہ روز آئی سی سی نے باضابطہ طور پر بنگلہ دیش کی درخواست مسترد کرتے ہوئے اعلان کیا تھا کہ اگر بنگلہ دیش ورلڈ کپ کھیلنا چاہتا ہے تو اسے اپنے تمام میچز میزبان ملک بھارت میں ہی کھیلنا ہوں گے۔
ادھر کرکٹ سے متعلق ایک ویب سائٹ کے مطابق، اگر بنگلہ دیش بھارت جانے سے انکار کرتا ہے تو آئی سی سی ایونٹ میں کسی متبادل ٹیم کو شامل کرنے کے آپشن پر بھی غور کر رہا ہے۔