سربیا سے تعلق رکھنے والے عالمی شہرت یافتہ ٹینس اسٹار نواک جوکووچ نے ایک اور شاندار سنگِ میل عبور کرتے ہوئے ٹینس کی تاریخ میں اپنا نام سنہری حروف سے لکھوا لیا ہے۔ وہ گرینڈ سلیم ٹورنامنٹس میں 400 میچز جیتنے والے دنیا کے پہلے کھلاڑی بن گئے ہیں۔
نواک جوکووچ نے یہ تاریخی کارنامہ آسٹریلین اوپن 2026 کے دوران انجام دیا۔ ہفتے کے روز کھیلے گئے میچ میں انہوں نے نیدرلینڈز کے حریف کو 6-3، 6-4 اور 7-6 (7/4) سے شکست دے کر نہ صرف راؤنڈ آف 16 میں جگہ بنائی بلکہ ایک نئی تاریخ بھی رقم کر دی۔
اس فتح کے ساتھ جوکووچ گرینڈ سلیم مقابلوں میں 400 میچز جیتنے والے پہلے کھلاڑی بن گئے۔ اس فہرست میں دوسرے نمبر پر سوئٹزرلینڈ کے لیجنڈ راجر فیڈرر ہیں جنہوں نے 369 میچز جیتے، جبکہ اسپین کے رافیل نڈال 314 فتوحات کے ساتھ تیسرے نمبر پر موجود ہیں۔
میچ کے بعد گفتگو کرتے ہوئے نواک جوکووچ نے کہا کہ وہ خود کو بہت اچھا محسوس کر رہے ہیں اور یہ ٹورنامنٹ کا ایک شاندار آغاز ہے، تاہم انہوں نے واضح کیا کہ وہ حد سے زیادہ پراعتماد نہیں ہونا چاہتے کیونکہ گزشتہ سال کے تجربات نے انہیں محتاط رہنے کا سبق دیا ہے۔
انہوں نے مزید کہا کہ وہ اب بھی نوجوان کھلاڑیوں کو سخت مقابلہ دینے کے لیے پُرعزم ہیں اور ہر میچ کو پوری توجہ اور محنت کے ساتھ کھیل رہے ہیں۔