تھرپارکر کے ضلعی ہیڈکوارٹر مٹھی میں واقع سول اسپتال میں گزشتہ تین ہفتوں کے دوران غذائی قلت اور مختلف بیماریوں کے باعث 45 معصوم بچے جان کی بازی ہار گئے، جب کہ مزید 75 بچے اب بھی زیرِ علاج ہیں۔
اسپتال انتظامیہ کے مطابق حالیہ 24 گھنٹوں میں انتقال کرنے والے تینوں بچوں کی عمریں ایک سال سے بھی کم تھیں۔ ایم ایس سول اسپتال مٹھی کا کہنا ہے کہ شدید سردی، غذائی قلت اور پیدائشی طور پر کم وزن ہونے کے باعث یہ بچے مختلف بیماریوں کا شکار تھے اور علاج کے باوجود جانبر نہ ہو سکے۔
ایم ایس کے مطابق بچوں کے وارڈ میں صرف 70 مریضوں کی گنجائش موجود ہے، مگر اس وقت سردی اور دیگر امراض میں مبتلا 76 بچے داخل ہیں، جس کے باعث طبی عملے کو شدید دباؤ کا سامنا ہے۔
دوسری جانب، بیمار بچوں کے والدین نے تشویش کا اظہار کرتے ہوئے بتایا ہے کہ اسپتال کے بچوں کے انتہائی نگہداشت وارڈ میں بنیادی طبی سہولیات اور وسائل کی کمی ہے، جس سے علاج کے عمل میں مشکلات پیش آ رہی ہیں۔
یہ صورتحال تھرپارکر میں غذائی قلت اور صحت کے دیرینہ مسائل کی ایک بار پھر سنگین تصویر پیش کر رہی ہے، جہاں معصوم جانیں اب بھی بروقت اور مؤثر طبی سہولتوں کی منتظر ہیں۔