اسلام آباد(طارق محمود سمیر)اسلام آباد میں منشیات کی روک تھام کو مؤثر بنانے کے لیے اینٹی نارکوٹکس فورس (اے این ایف) کے اشتراک سے ایک قومی سیمینار منعقد کیا گیا، جس میں نجی کوریئر سروسز کے ذریعے منشیات کی اسمگلنگ کے بڑھتے ہوئے خطرات پر خصوصی توجہ دی گئی۔ یہ ایک روزہ سیمینار منشیات کے استعمال کی روک تھام کے بین الاقوامی پروگرام UPSCALE کے تعاون سے منعقد ہوا۔
سیمینار کا مقصد کوریئر اور پارسل سروسز کے ذریعے منشیات کی اسمگلنگ کے بڑھتے رجحان کے خلاف متعلقہ اداروں کے درمیان ہم آہنگی اور تعاون کو فروغ دینا تھا۔ وزیر مملکت برائے داخلہ طلال چوہدری نے بطور مہمانِ خصوصی شرکت کی، جبکہ ڈی جی اے این ایف، سینئر افسران، متعلقہ سرکاری محکموں اور نجی کوریئر کمپنیوں کے نمائندگان بھی موجود تھے۔
سیمینار میں منشیات کے استعمال کی روک تھام کو وسعت دینے کے پروگرام پر تفصیلی بریفنگ دی گئی۔ ڈائریکٹر انفورسمنٹ اے این ایف نے ملک میں منشیات کی موجودہ صورتحال سے آگاہ کیا اور کوریئر و پارسلز کے ذریعے منشیات اسمگلنگ کے بڑھتے ہوئے رجحان پر روشنی ڈالی۔
شرکاء کو کوریئر سروسز کے ذریعے منشیات اسمگلنگ کے منفی اثرات سے آگاہ کیا گیا اور اس کے تدارک کے لیے مجوزہ اقدامات پیش کیے گئے۔ سیمینار کے شرکاء نے منشیات کی روک تھام کے نظام کو مضبوط بنانے اور باہمی ہم آہنگی سے مؤثر اقدامات کرنے کے عزم کا اعادہ کیا۔
شرکاء نے انسدادِ منشیات کے لیے اے این ایف کی کاوشوں اور جامع حکمتِ عملی کو سراہتے ہوئے اس عزم کا اظہار کیا کہ اینٹی نارکوٹکس فورس ملک سے منشیات کی لعنت کے مکمل خاتمے کے لیے پرعزم ہے۔