پاکستان نے سیریز کے دوسرے ٹی ٹوئنٹی میچ میں آسٹریلیا کے لیے 199 رنز کا ہدف طے کر دیا ہے۔
لاہور کے قذافی اسٹیڈیم میں کھیلے جانے والے میچ میں پاکستان نے ٹاس جیت کر پہلے بیٹنگ کا فیصلہ کیا۔ قومی ٹیم نے مقررہ 20 اوورز میں 5 وکٹوں کے نقصان پر 198 رنز بنائے۔ کپتان سلمان علی آغا نے 76 رنز کی شاندار اننگز کھیلی، عثمان خان نے 53 رنز بنائے جبکہ صائم ایوب 23 رنز تک پہنچے۔ شاداب خان 28 رنز بنا کر ناٹ آؤٹ رہے۔
آسٹریلیا کی جانب سے ریویئر بارٹلیٹ، میتھیو کنہیمین، شین ایبٹ، ایڈم زیمپا اور کوپر کونولی نے ایک ایک وکٹ حاصل کی۔
ٹاس کے بعد گفتگو کرتے ہوئے پاکستان کے کپتان سلمان علی آغا نے بتایا کہ آج کی ٹیم میں تین تبدیلیاں کی گئی ہیں: عثمان طارق، فہیم اشرف اور نسیم شاہ کو پلیئنگ الیون میں شامل کیا گیا ہے، جبکہ شاہین شاہ آفریدی، سلمان مرزا اور فخر زمان آج کا میچ نہیں کھیل رہے۔
یاد رہے کہ سیریز کے پہلے ٹی ٹوئنٹی میچ میں پاکستان نے آسٹریلیا کو 22 رنز سے شکست دی تھی، اور سیریز کا آخری میچ کل کھیلا جائے گا۔