گورنر سندھ کامران خان ٹیسوری نے کراچی کے تاجروں اور صنعت کاروں کو یقین دلایا ہے کہ جس کے پاس بھی بھتے کی پرچیاں آ رہی ہیں، وہ انہیں براہِ راست ان کے پاس لے آئے، اور وہ خود رقم ادا کر دیں گے۔
کراچی کے ایکسپو سینٹر میں منعقدہ نمائش “مائی کراچی” کے دوران گفتگو کرتے ہوئے گورنر سندھ نے کہا کہ لاہور کی ترقی دیکھ کر خوشی ہوئی اور ان کا یقین ہے کہ کراچی بھی جلد ترقی کرے گا۔ انہوں نے کہا کہ شہر کے تاجروں اور صنعت کاروں نے بھتے کی پرچیاں ملنے کی شکایات کی ہیں، اور اس مسئلے کے حل کے لیے وہ خود قدم اٹھانے کے لیے تیار ہیں۔
گورنر سندھ نے کراچی میں آتشزدگی کے واقعات پر بھی بات کی اور کہا کہ آگ لگنے کے حادثات ہوتے رہتے ہیں، مگر اس پر قابو پانے کے لیے منظم حکمت عملی ضروری ہے۔ انہوں نے بتایا کہ کراچی کے لیے مخیر حضرات کی مدد سے 50 فائر ٹینڈرز فراہم کرنے کا منصوبہ زیرِ غور ہے اور جلد پیشرفت ہوگی۔
کامران خان ٹیسوری نے کہا کہ کراچی فلاحی اداروں کو سالانہ 250 ارب روپے کے عطیات دیتا ہے اور پاکستانی معیشت میں شہر کی اہمیت کسی سے ڈھکی چھپی نہیں، اس لیے کراچی کی ترقی انتہائی ضروری ہے۔
انہوں نے کہا کہ بھارتی اسپانسر شدہ دہشت گردوں سے کسی کو خوف نہیں ہونا چاہیے، اور پاکستان ہمیشہ مناسب جواب دینے کے لیے تیار ہے۔ گورنر سندھ نے مزید کہا کہ “مائی کراچی” پروگرام شہر کو حقیقی معنوں میں اپنا بنانے کا موقع فراہم کر رہا ہے۔
آخر میں انہوں نے گل پلازہ کے متاثرین کے لیے سندھ حکومت اور کراچی چیمبر کے تعاون کی تعریف کی اور تمام اداروں کو خراجِ تحسین پیش کیا۔