سابق وزیر خزانہ مفتاح اسماعیل نے کہا ہے کہ پاکستان آج مشکل حالات کا سامنا کر رہا ہے، جس کی بنیادی وجہ ملک کا غیر مؤثر سیاسی ڈھانچہ ہے۔
اپنے بیان میں انہوں نے کہا کہ ملک مسائل میں الجھا ہوا ہے، جہاں غربت اور بے روزگاری عام ہیں، اور اس مسئلے کا حل آئین پر سب کی اتفاق رائے میں مضمر ہے۔ انہوں نے واضح کیا کہ پاکستان کے مسائل سیاستدانوں کی ذاتی خامیوں کی وجہ سے نہیں بلکہ سیاسی ڈھانچے کی کمزوری کی وجہ سے ہیں۔
مفتاح اسماعیل نے یاد دہانی کرائی کہ 2008ء میں جمہوریت بحال ہونے کے بعد بلدیاتی نظام ختم کر دیا گیا، اور ان کے بقول دہشت گردی کے مکمل خاتمے تک ملک آگے نہیں بڑھ سکتا۔
انہوں نے آبادی کے کنٹرول اور تعلیم پر بھی زور دیا، بتایا کہ پاکستان میں 2 کروڑ سے زائد بچے اسکول نہیں جاتے، جبکہ بھارت میں اسکولوں میں بچوں کو ناشتہ فراہم کیا جاتا ہے جس سے اسکول آنے والے بچوں کی تعداد میں اضافہ ہوتا ہے۔ مفتاح اسماعیل نے کہا کہ وسائل کی کمی کے باوجود ایسے اقدامات ملک کی ترقی میں مددگار ثابت ہو سکتے ہیں۔