امریکی ناظم الامور نیٹلی بیکر نے کہا ہے کہ پاک امریکا معاشی شراکت داری کے ذریعے دونوں ملک مل کر روزگار کے مواقع پیدا کر رہے ہیں۔
نیٹلی بیکر نے سندھ کا دورہ کیا اور اس موقع پر معاشی ترقی اور باہمی تعاون کے عزم کا اعادہ کیا۔ امریکی قونصل خانہ کراچی کی جانب سے جاری اعلامیے کے مطابق، نیٹلی بیکر نے 25 سے 31 جنوری کے دوران سندھ کے مختلف علاقوں میں سیاسی قائدین، کاروباری شخصیات اور مقامی نمائندگان سے ملاقاتیں کیں۔
ان کا دورہ اقتصادی ترقی، علاقائی استحکام اور پاک امریکا مشترکہ ترجیحات کو آگے بڑھانے کے مقصد کے تحت ترتیب دیا گیا تھا۔
نیٹلی بیکر نے میرپورخاص میں شوگر مل، ایتھانول، کاربن ڈائی آکسائیڈ اور پیپر پلانٹ کا دورہ کیا جبکہ گڑھی خدا بخش میں ذوالفقار علی بھٹو، بے نظیر بھٹو اور دیگر رہنماؤں کی قبروں پر بھی حاضری دی۔
انہوں نے ہندو برادری کے رہنماؤں سے ملاقات میں بین المذاہب ہم آہنگی اور تمام شہریوں کے یکساں حقوق کے تحفظ پر بات چیت کی۔
امریکی ناظم الامور نے حیدرآباد کے نیاز اسٹیڈیم کا بھی دورہ کیا اور اسپیکر سندھ اسمبلی اویس قادر شاہ کے ساتھ ملاقات کی، اس کے علاوہ سکھر کے میئر سے بھی ملاقاتیں کی گئیں۔