گلگت (نیوز ڈیسک)گلگت بلتستان میں کھیلوں کے فروغ اور نوجوانوں کی حوصلہ افزائی کے لیے ایف سی این اے کے زیرِ اہتمام دوسرا انٹر ڈسٹرکٹ فٹ بال ٹورنامنٹ 2026 کامیابی کے ساتھ اختتام پذیر ہوگیا۔ اس بڑے اسپورٹس ایونٹ نے خطے کے نوجوان کھلاڑیوں کو اپنی صلاحیتیں دکھانے کا بہترین موقع فراہم کیا۔

گلگت بلتستان کے سب سے بڑے فٹبال مقابلے کی اختتامی تقریب لالک جان اسٹیڈیم جوٹیال میں منعقد کی گئی، جہاں شائقین کی بڑی تعداد نے فائنل میچ دیکھا اور کھلاڑیوں کی بھرپور حوصلہ افزائی کی۔ ٹورنامنٹ کا انعقاد پاک فوج کے تعاون سے کیا گیا، جس کا مقصد نوجوانوں کو مثبت سرگرمیوں کی جانب راغب کرنا اور کھیلوں کے ذریعے صحت مند مقابلے کا فروغ دینا تھا۔

چیمپئن شپ میں گلگت بلتستان کے مختلف اضلاع سے مجموعی طور پر 17 ٹیموں نے شرکت کی اور شاندار کھیل کا مظاہرہ کیا۔ ٹورنامنٹ کے دوران سخت مقابلے دیکھنے میں آئے، جس سے علاقائی سطح پر موجود بے پناہ ٹیلنٹ کھل کر سامنے آیا۔

اختتامی تقریب میں نگران وزیر اعلیٰ گلگت بلتستان، کمانڈر ایف سی این اے، پولیس حکام سمیت مختلف حکومتی و سماجی شخصیات نے شرکت کی اور کھلاڑیوں کی کارکردگی کو سراہا۔

سنسنی خیز اور اعصاب شکن فائنل مقابلے میں این ایل آئی مارخور نے حریف ٹیم کو 0-1 سے شکست دے کر ٹورنامنٹ کا ٹائٹل اپنے نام کیا۔ میچ کے دوران دونوں ٹیموں نے بھرپور کھیل پیش کیا، تاہم این ایل آئی مارخور نے فیصلہ کن گول کر کے کامیابی حاصل کی۔

شائقین فٹبال نے گلگت بلتستان میں کھیلوں کے فروغ کے لیے پاک فوج اور ایف سی این اے کی کاوشوں کو سراہتے ہوئے کہا کہ ایسے ایونٹس نوجوانوں کو منفی سرگرمیوں سے دور رکھنے اور قومی سطح پر پاکستان کا نام روشن کرنے میں اہم کردار ادا کرتے ہیں۔

چیمپئن شپ نے گلگت بلتستان کے نوجوانوں کے اندر موجود بے پناہ ٹیلنٹ اور بین الاقوامی سطح پر پاکستان کی نمائندگی کرنے کے عزم کو اجاگر کیا، جبکہ منتظمین نے مستقبل میں بھی اس نوعیت کے کھیلوں کے مقابلوں کے تسلسل کا عزم ظاہر کیا۔